आजदेखि हवाई भाडा घट्यो, कहाँको भाडा कति ? (भाडादर सहित)

केन्द्रभाग मिडिया

काठमाडौँ ।

आजदेखि हवाई भाडादर घटेको छ ।

सरकारले इन्धनको मूल्य घटाएपछि हिजोदेखि पेट्रोल डिजेलको उपभोक्ता मुल्य घटेकोमा आजदेखि हवाई भाडा पनि घटेको हो । सरकारले हवाई इन्धनमा प्रतिलिटर १० रुपैयाँ घटाएको छ ।

वायुसेवा सञ्चालक सङ्घका अनुसार काठमाडौँबाट धनगढीको उडानमा सबैभन्दा धेरै ४४० रुपैयाँ भाडा घटेको छ । यसअघि यो रुटमा यात्रुले हवाई इन्धनका लागि मात्र ७ हजार ५१० रुपैयाँ तिरिरहेकोमा अब ७ हजार ७० रुपैयाँ तिरे पुग्नेछ ।

काठमाडौँबाट हुने माउन्टेन फ्लाइटमा ३४५ रुपैयाँले भाडा घटेको छ । अब माउन्टेन फ्लाइटको अधिकतम भाडा ५ हजार ४९० रुपैयाँ कायम भएको छ । काठमाडौँबाट भद्रपुरका लागि ३०० रुपैयाँ भाडा घटेको छ । विराटनगरलाई २४०, जनकपुरका लागि १३०, भरतपुरका लागि १०५ र पोखराका लागि १५५ रुपैयाँ हवाई भाडा घटेको छ ।

काठमाडौँबाट भैरहवा उडानको भाडा २०५ रुपैयाँले घटेर ३ हजार २९५ रुपैयाँ कायम भएको छ । नेपालगन्जमा ३२५, तुम्लिङटारका लागि १८५, सिमराका लागि ९० रुपैयाँ, सुर्खेतका लागि ३४५ र राजविराजका लागि २०५ रुपैयाँ भाडा घटेको छ । यो भाडादर आजैदेखि लागू हुनेछ ।

  • २२ चैत्र २०७९, बुधबार १०:०० प्रकाशित