पोखरा ।
श्री सत्य साई केन्द्र सिमलचौरको आयोजनामा बुधबार विहान रक्तदान कार्यक्रम सम्पन्न भएको छ । सत्य साई बाबाको ९९ औं जन्मोत्सवको अबसर पारेर आयोजना गरिएको ५ दिवशीय कार्यक्रम अन्तर्गत भएको रक्तदान कार्यक्रममा ३० युनिट रगत संकलन भएको अध्यक्ष कमला भट्टराईले जानकारी दिइन् ।
रक्तदान कार्यक्रमको उद्घाटन पोखरा ८ का वडाध्यक्ष रुद्धनाथ बरालले पहिलो रक्तदाता सशस्त्र प्रहरीका प्रहरी निरीक्षक पृथ्वीन्द्र खनाललाई ब्लड व्यवग हस्तान्तरण गरेर गरेका हुन् । सो अबसरमा बोल्दै वडाध्यक्ष बरालले श्री सत्यसाई केन्द्र सिमलचौरले रक्तदान जस्तो महत्वपूर्ण कार्य गरेर सत्य साई बाबाको जन्मोत्सव कार्यक्रम गरेकामा आभार प्रकट गरे ।
एकजनाले दिएको रगतले अर्को एकजनाको जीवन जिउन मद्यत पुग्ने भन्दै उनले यस्ताखालका कार्यक्रमलाई निरन्तरता दिन आग्रह गरे । कार्यक्रममा उपाध्यक्ष प्रेमा गिरीले रक्तदान कार्यक्रमको बारेमा जानकारी दिएकी थिइन् ।
सत्य साई बाबाको ९९ जन्मोत्सव ५ दिवशीय रुपमा विभिन्न कार्यक्रम गरेर मनाइैछ । हिजो पहिलो दिन मानवसेवा आश्रममा रहेका आश्रितलाई खाद्यान्न, फलफूल र लत्ता कपडा वितरी गरिएको, आज रक्तदान कार्यक्रम भएको, भोलि विद्यालयमा स्टेसनरी सामग्री वितरण गरिने, त्यसपछि मन्दिर सरसफाई र र्यालीसहित विभिन्न कार्यक्रम गरिने अध्यक्ष कमला भट्टराईले बताइन् ।
