पोखरा ।
नेकपा एमालेका महासचिव शंकर पोखरेलले बर्तमान सत्ता गठबन्धन बामपन्थी गठबन्धन नरहेको बताएका छन् । शनिबार एमाले कास्कीको ११ औं जिल्ला अधिवेशनलाई उद्घाटन गर्दै उनले यस्तो बताएका हुन् ।
कतिपयले बमपन्थी दलहरुको सहभागिताले बर्तमान सरकारलाई बामपन्थी भन्ने गरेका भन्दै उनले त्यस्तो नरहेको उल्लेख गरे । उनले नेकपा एमाले समाजवादी मोर्चामा सामेल नहुने समेत प्रष्ट्याएका छन् । यद्यपी भविष्यमा यस्तो मोर्चामा बनाउन सकिने उनले संकेत भने गरे । ‘कतिपय यो गठबन्धनलाई बामपन्थी गठबन्धन भनेका छन् । त्यस्तो होइन । समाजवादी मोर्चा बनाएर अहिले नै जानुपर्छ पनि भनिरहेका छैनौं’ उनले भने ।
उनले एमाले सरकारमा सामेल हुँदैमा मिसन ८४ नरोकिने पनि बताए । ‘मिसन ८४ भनेको एमाले सरकारमा सामेल भयो भनिएको छ । मिसन ८४ मुलुकको भविश्य निर्माणको एउटा संकल्प हो । हामी एमाले बिरुद्धको चक्रव्युहलाई तोडेर बाहिर आएका छौं । यही आधारमा मिसन ८४ सफल बनाउन चहन्छौं’ उनले भने । राजनीतिक अस्थिरताको वर्तमान अवस्थाले सामाजिक अराजकता फैलिएको टिप्पणी गरेका उनले मिसन ८४ले त्यसलाई रोक्ने र आशा जगाउने समेत दाबी गरे ।
वर्तमान सत्ता गठबन्धन बन्दा कांग्रेसका नेताहरु तिल्मिलाईरहेका उनले बताए । उनले कांग्रेसलाई गठबन्धनबाट बाहिर आउ भन्दा संबाद गर्नपनि नआउने गरेको टिप्पणी गर्दै बामपन्थीहरुको बीचमा फाटो ल्याएर आफ्नो भविष्य देख्ने कांग्रेसको चिन्तनले नेपालको राजनीतिले सहि बाटो लिन नसक्ने बताए । उनले नीतिका आधारमा राजनीति गर्ने हो भने अब नेपालको राजनीतिलाई नीतिको बहसका आधारमा अगाडि बढाउनु पर्ने बताए । ‘कांग्रेसले यो मान्यताका आधार आगाडि बढाउन चाहन्र्छौं भन्न सक्नुपर्छ त, यो भन्न तयार छैन’ उनले भने ।
राजनीतिक दलहरुलाई बलियो बनाउनेगरी अगाडि बढाउन आफूहरु चाहेको र मुलुकलाई राजनीतिक सहि मार्ग पहिल्याउन एमाले जस्तो सुकै त्याग गर्न तयार रहेको उनको भनाई थियो । वर्तमान अवस्थामा नीतिले नेतृत्व गर्ने अवस्था नरहेकोले महत्वपूर्ण मन्त्रालय नलिएरै भएपनि एमालेले नयाँ सरकारमा सामेल भएको धारणा राखे ।
एमालेको ११ औं जिल्ला अधिवेशनमा कास्कीका ७२ वडा, जनसंगठन, सल्लाहकार परिषद्, तीन इलाकाका शाखा कमिटी, आयोजक कमिटीबाट गरी ९ सय ३५ प्रतिनिधि रहभागी रहनेछन् । पोखरा प्रदर्शनी केन्द्रमा उद्घाटन भएको अधिवेशनको बन्दसत्र भने पोखरा सभागृहमा हुनेछ ।
अधिवेशनले कास्कीको भूगोल, इलाका कमिटीको प्रतिनिधित्व हुने गरी १ सय २० सदस्यीय कार्यसमिति चयन गर्ने छ । पार्टीको विधान अनुसार १० प्रतिशत मनोनित र विभिन्न पार्टीबाट समायोजन १० प्रतिशत गरी १ सय ४१ सदस्यीय जिल्ला कमिटी कास्की निर्माण हुने उनले उल्लेख गरे ।
