पोखरा ।
पोखरा अन्तर्राष्ट्रिय विमानस्थल आज उद्घाटन गरिँदैछ । प्रधानमन्त्री प्रचण्डले आज एक भव्य समारोहका बीच विमानस्थलको उद्घाटन गर्ने विमानस्थलका निर्देशक बिक्रम गौतमले जानकारी दिएका छन् ।

उद्घाटन समारोहमा उपप्रधानमन्त्री तथा अर्थमन्त्री विष्णु पौडेल, विभिन्न राजनीतिक दलका शीर्ष नेताहरू, उद्योगी तथा पर्यटन व्यवसायीको बृहत् सहभागिता रहने उनले बताए । यसैगरी नेपाल नागरिक उड्डयन प्राधिकरण, प्रदेश सरकार, पोखरा महानगरपालिका, पोखरा पर्यटन परिषद्लगायत पर्यटन संघ संस्थाको सहभागितामा उद्घाटन हुने उनको भनाई छ ।

५ दशक लामो उतारचढावपछि पोखरा अन्तर्राष्ट्रिय विमानस्थल उद्घाटन हुने भएसंगै यही खुसीमा पोखरा महानगरपालिकाले आज (आइतबार) सार्वजनिक बिदा दिएको छ ।

आज अमरसिंह चोकदेखि विमानस्थलसम्म विभिन्न जातजातिको साँस्कृतिक झाँकीसहित ¥याली निकाल्ने तयारी छ । विमानस्थलको परिकल्पना गरी जग्गा अधिग्रहण सुरु गरेका तत्कालीन अञ्चलाधीश शंकरराज पाठकलाई अभिनन्दन गर्ने कार्यक्रम रहेको पोखरा महानगरका मेयर धनराज आचार्यले जानकारी दिएका छन् ।

उनका अनुसार पाठकसँगै तत्कालीन प्लानर पदमबहादुर क्षेत्रीलाई पनि अभिनन्दन गर्ने कार्यक्रम थियो तर उनी उपचारका लागि बाहिर छन् । बिहान पहिलो उडानबाट विमानस्थलमा अवतरण गर्ने जहाजका चालक दल तथा यात्रुलाई फूलमालाले स्वागत गरिने छ ।