पोखरा ।
गण्डकी प्रदेश पर्यटन बोर्ड पुर्नगठन गर्न ट्रेकिङ एजेन्सिज एसोसिएसन अफ नेपाल(टान)ले माग गरेको छ ।पर्यटनको क्षेत्रमा काम गर्ने अगुवा संस्था टान गण्डकीले पब्लिक प्राइभेट पार्टनरसिप (पीपीपी) साझेदारीमा कार्य गर्ने गरी बोर्डको स्थापना भए पनि सो अनुसार बोर्डले काम गर्न नसकेको भन्दै बोर्डको पुनर्गठन हुनुपर्ने माग गरेको छ ।
संघीयता कार्यान्वयनसगै नेपाल पर्यटन बोर्डको गण्डकी प्रदेशमा प्रदेश स्तरीय कार्यालयको औचित्य माथि नै प्रश्न उठ्ने गरेका छन् । नेपाल पर्यटन बोर्डको कार्यशैली प्रति यहाँका पर्यटनसंग आवद्ध संघसंस्थाले असन्तुष्टि जनाउदै आएका छन् । पोखराका विभिन्न संघ संस्थाले संघीयताको मर्म अनुसार प्रदेश सरकार मातहतको गण्डकी प्रदेश पर्यटन बोर्ड गठन हुनुपर्ने आवाज उठाउदै आएका हुन् ।
बोर्डले उदेश्य अनुसार राष्ट्रिय र अन्तराष्ट्रिय स्तरमा पर्यटन प्रर्वद्धन, प्रचार सामाग्री निर्माण र नयाँ गन्तब्यको खोजी रहेकोमा व्यवहारमा नदेखिएको भन्दै बोर्ड पुनर्गठन गर्न टान अध्यक्ष कृष्ण आचार्यले माग गरे ।
टान गण्डकीले पर्यटन बोर्ड संघीयताको मर्म अनुसार पुनर्गठन गर्न गण्डकी प्रदेश सरकारसंँग माग गरेको छ । अध्यक्ष आचार्यले गण्डकी प्रदेश उद्योग तथा पर्यटन मन्त्री यशोदा रिमाललाई ज्ञापनपत्र बुझाउँदै प्रदेश सरकारले पर्यटन क्षेत्रको आवश्यकतालाई बुझ्न नसकेको बताए ।
उनले पोखरा नेपालको पर्यटकको राजधानी घोषणा भइसेको अवस्थामा पनि पर्यटकको यथार्थ तथ्याङक संकलन हुन नसक्नु दुख रहेको बताए ।
