काठमाडौं।
बाजुराको हिमाली गाउँपालिका–५ स्थित क्युडीमा जिप दुर्घटना भएको छ ।
जिप दुर्घटनामा परेर ९ जना व्यक्तिहरू घाइते भएको प्रहरी प्रधान कार्यालयले जनाएको छ । क्युडीस्थित कुवाडी–क्युडी कच्ची सड्क खण्डमा सोमबार दिउँसो सुदूरपश्चिम प्रदेश ०१–००१ ज १८७८ नम्बरको जिप दुर्घटना भएको हो ।
दुर्घटनामा परेर जिप चालक हिमाली गाउँपालिका–२ नातीखोला घर भएका २५ वर्षीय जनवीर बुढा पनि घाइते भएका छन् । प्रहरीको केन्द्रीय समाचार कक्षका अनुसार घाइते हुनेमा हिमाली गाउँपालिका बस्ने ४० वर्षीय धर्मलाल बुढा, ३१ वर्षीया मिजरा बुढा, हुम्ला घर भएका ४० वर्षीय अम्मर सिंह बुढा, बाजुराको हिमाली गाउँपालिका–२ घर भएकी २० वर्षीया अस्मिता थापा, २८ वर्षीय जंगसिंह बुढा, २० वर्षीय गोरख रोकाया, २७ वर्षीय लोकेन्द्र बुढा र ९ वर्षीया सुस्मा बुढा छन् ।
घाइतेमध्ये ४ जनाको अवस्था मध्यम र ५ जनाको अवस्था सामान्य छ । जिप सडकबाट १० मिटर तल खसेको प्रहरीले जनाएको छ ।
