काठमाडौं ।

प्रधानमन्त्री वालेन्द्र शाह (बालेन) उपस्थित नहुने भएपछि प्रतिनिधि सभा अन्तर्गतको राज्यव्यवस्था तथा सुशासन समितिको बैठक बस्दै नबसी स्थगित भएको छ । सोमबार बिहान ११ बजेका लागि बैठक बोलाइएको थियो ।

समितिका कार्यक्षेत्र प्रधानमन्त्री तथा मन्त्रिपरिषद्को कार्यालय, गृह मन्त्रालय, रक्षा मन्त्रालय, संघीय मामिला तथा सामान्य प्रशासन मन्त्रालय, अख्तियार दुरुपयोग अनुसन्धान आयोग, लोक सेवा आयोग, निर्वाचन आयोग पर्छन् । समिति बैठक मन्त्री नभई बस्ने परम्परा नरहेको र समितिको कार्यक्षेत्र पर्ने प्रधानमन्त्री र मन्त्री आउन नसक्ने भएपछि स्थगित गरिएको समिति सचिव सहसचिव कान्छा दुलालले जानकारी दिए ।

‘समितिमा मन्त्री नभई नबस्ने परम्परा छ । हाम्रो कार्यक्षेत्रमा प्रधानमन्त्री तथा मन्त्रिपरिषद्को कार्यालय, गृह, रक्षा र संघीय मामिला तथा सामान्य प्रशासन मन्त्रालय पर्छन्,’ समिति सचिव दुलाले रातोपाटीसँग भने, ‘प्रधानमन्त्रीज्यू आउन सक्ने अवस्था रहेन । गृह र रक्षा उहाँ आफैले सम्हाल्नुभएको छ । सामान्य प्रशासनमन्त्री अन्तै कार्यक्रम तय भएको रहेछ । त्यसैले स्थगित गरौँ भनेर गरिएको हो । अन्य कुनै विषय छैन ।’

बैठकमा समितिको कार्यक्षेत्र र समितिको आगामी कामकारबाहीका सम्बन्धमा छलफल गर्ने कार्यसूची थियो । समिति सचिवालयले सूचना निकालेर विशेष कारणवश बैठक स्थगित गरिएको जनाएको छ ।