अटेरी उम्मेद्वार उदासको कार्ययोजना सार्वजनिक

केन्द्रभाग मिडिया

पोखरा ।

पोखरा ३ का अटेरी उम्मेद्वारले चुनावी कार्ययोजना सार्वजनिक गरेका छन् । आउँदो स्थानीय तह निर्वाचनका लागि स्वतन्त्र (अटेरी) उम्मेद्वारी घोषणा गरेका महेश उदासले आफ्नो चुनावी घोषणापत्र सार्वजनिक गरेका हुन् ।

घोषणापत्र सार्वजनिक गर्दै उदासले वडाका प्राचीन सम्पदा संरक्षणमा लागि पर्ने बताए । राजनीतिक दल छाडेर स्वतन्त्र उम्मेद्वारी सार्वजनिक गर्न पाउँदा गर्व महसुस गरेको उनले सुनाए । ‘सम्पदा बस्तिको सन्तान भएकाले यहाँको बस्तुस्थिति मलाई थाहा छ, यहाँको आवश्यकता र जनचाहना थाहा छ,’ उनले भने, ‘चुनाव आएपछि मात्रै जनताको घरदैलो चहार्ने नेता देखेर वाक्क भएका नागरिक नै मेरो उर्जा हुन् ।’

साथै, सोही कार्यक्रममा वडा नम्बर ३ को वडा सदस्य पदमा दिनेश उदासले समेत अटेरी उम्मेद्वारी सार्वजनिक गरेका थिए ।

कार्यक्रममा अटेरी अभियानका परिकल्पनाकार तथा पोखरा महानगर प्रमुखमा अटेरी उम्मेद्वारी घोषणा गरेका गनेस पौडेल सबैलाई अटेर हुन आह्वान गरेका थिए । उनले जुनसुकै दलमा आबद्ध रहे पनि पार्टी पद्धतिमा नचले अटेर गर्न सबैलाई आह्वान गरे । कार्यक्रममा वडा नम्बर ३ बासिको बाक्लो उपस्थिति रहेको थियो ।

कार्यक्रम अटेरीका निर्वाचन अभियान संयोजक हरि कार्कीले सञ्चालन गरेका थिए ।

  • ३ बैशाख २०७९, शनिबार १५:३२ प्रकाशित