काठमाडौं ।
नेपाल प्रिमियर लिग (एनपिएल) मा आइतबार आज दुई खेल हुँदैछन् । त्रिवि मैदान कीर्तिपुरमा बिहान ९ बजे काठमाडौं गुर्खाज र विराटनगर किंग्स खेल्नेछन्।
दिउँसो १ बजे सुदूरपश्चिम रोयल्स र पोखरा एभेन्जर्स खेल्नेछन् । अंक तालिकामा पाँचौं स्थानमा रहेको काठमाडौंलाई प्लेअफ सम्भावना कायमै राख्न आजको खेल जित्नैपर्ने दबाव छ ।
जितेको खण्डमा चौथो स्थानमा रहेको कर्णाली याक्ससँग काठमाडौंको अंक बराबरी ८ हुनेछ । कर्णालीले अन्तिम खेल भोलि सुदूरपश्चिमसँग खेल्न बाँकी छ । सुदूरपश्चिमसँग पराजित भए र आजको खेलमा काठमाडौं विजयी भए काठमाडौंको सम्भावना रहन्छ ।
काठमाडौं पराजित भएको खण्डमा प्लेअफमा जाने टोलीको आजै टुंगो लाग्नेछ। विराटनगर र पोखरा भने यसअघि नै लिगबाट बाहिरिएका छन् ।
शनिबार चितवन राइनोजले जनकपुर बोल्ट्सलाई हराएसँगै विराटनगर र पोखरा प्लेअफ होडबाट बाहिरिएका हुन् । लुम्बनी लायन्स त्यो भन्दा अगाडि नै प्रतियोगिताबाट बाहिरिएको थियो ।
