पोखरा ।
पोखरामा यस वर्ष भदौ ८ गते शनिबार तायाःमचा नृत्य प्रतियोगिता हुने भएको छ । हरेक वर्ष पोखरामा हुँदै आएको तायाःमचा नृत्य प्रतियोगिता यस वर्ष पोखरा महानगरपालिका वडा नम्बर–९ नयाबजारस्थित शिव–गणेश मार्गमा हुने भएको हो ।
प्रतियोगितामा प्रथम हुनेले ३ लाख रुपैयाँ नगदसहितको पुरस्कार पाउने भएका छन् । प्रतियोगितामा द्वितीय हुनेलाई २ लाख १ रुपैयाँ, तृतीय हुनेलाई १ लाख १ रुपैयाँ र सान्त्वना हुनेलाई १० हजार १ रुपैयाँ प्रदान गरिने मूल संयोजक श्रेष्ठले जानकारी दिए ।
महिलातर्फ प्रथम हुनेलाई ५० हजार, द्वितीय हुनेलाई ३० हजार र तृतीय हुनेलाई २० हजारसहित प्रमाणपत्र प्रदान गरिने उनले बताए । पुरस्कारको सबै राशी पोखरा तेर्सापट्टी निवासी स्व.हेमप्रसाद र बालकुमारी श्रेष्ठको स्मृतिमा उनका परिवारले उपलब्ध गराउने जनाइएको छ । शनिबार पत्रकार सम्मेलन गरेर यस्तो जानकारी गराइएको हो ।
नेवाःखल कास्कीको आह्वानमा हुने प्रतियोगिता यस वर्ष नयाबजार सांस्कृतिक समितिको आयोजना तथा नेवा ल्याम्ह पुचः नयाबजार, नेवा मिसा पुचः नयाबजार र नेवाः कल्याणकारी गुठीसँगको सहकार्यमा हुनलागेको पत्रकार भेटघाट कार्यक्रममा जानकारी दिइयो।
नेवार समुदायमा परिवारको सदस्यको मृत्यू भएको एक वर्ष भित्र गाईजात्रा निकाल्ने परम्परा छ । गाईजात्रामा तायाःमचा नृत्यसमेत समावेश गर्ने प्रचलन छ । गाईजात्राको अवसरमा देखाईने तायाःमचा नृत्यको संरक्षण, सम्वद्र्धन र प्रवद्र्धन गर्ने उद्देश्यले पोखरामा गाईजात्रा पछिको पहिलो शनिबार तायाःमचा नृत्य प्रतियोगिता हरेक वर्ष आयोजना गरिदै आएको छ ।
प्रतियोगिता सम्पादन समितिका मूल संयोजक शम्भुलाल श्रेष्ठले प्रतियोगिताका लागि प्रायोजक खोज्नेदेखि कचाः खलहरुलाई पत्राचार गर्नेलगायतका कार्यहरु भइरहेको बताए । प्रतियोगितामा पोखरा महानगरपालिका वडा नम्बर ९ को विशेष सहयोग रहने उनले जानकारी दिए । प्रतियोगितामा यस वर्ष ३६ टिम सहभागी हुने अनुमान गरिएको मूल संयोजक शम्भुलाल श्रेष्ठले बताए ।
कार्यक्रममा बोल्दै नेवाः खल कास्कीका अध्यक्ष अशोक पालिखेले नेवारी कला र संस्कृति जगेर्ना उद्देश्यले हरेक वर्ष तायाःमचा प्रतियोगिता गर्नेगरेको बताए । ‘उनले आफ्नो कला र संस्कृतिको संरक्षण गर्न सबै इमान्दार भएर लाग्नुपर्ने धारणा राखे ।
पोखरा–९ का वडाध्यक्ष दीपेन्द्र मर्सानीले कला, संस्कार, संस्कृतिलगायतका कुराहरुको संरक्षण, सम्वद्र्धन र प्रवद्र्धन गर्ने जिम्मेवारी स्थानीय सरकारको भएकाले वडाले प्रतियोगिताका लागि सहयोग गरेको बताए । ‘यस्ता कार्यक्रममा सहयोग गर्ने जिम्मेवारी स्थानिय सरकारको हो । हामीले जिम्मेवार भएर सहयोग गरेका हौं । बरु यस्ता कार्यक्रमलाई मन जोड्ने कार्यक्रमका रुपमा विकास गर्नपनि पहल गर्नुपर्छ’ उनले भने ।
