पोखरा ।
होटल संघ पोखराको आयोजनामा जाउँ है पोखरा अभियान सुरु भएको छ । विगतमा जस्तै यस वर्षपनि होटल संघ पोखराले यस वर्ष पूर्वका जिल्लाहरुबाट सुरु गरेको यो अभियान शुक्रबार पश्चिमका जिल्लाहरुका लागि सुरु गरेको हो । होटल संघ पोखरा नेपालले पश्चिमका जिल्लाहरुका लागिआजदेखि ६ दिने ‘जाऔं है पोखरा अभियान’ सुरु गरेको संघका अध्यक्ष लक्ष्मण सुवेदीले जानकारी दिए ।
उनका अनुसार पोखराबाट होटलसंघ सहित पर्यटन सम्बद्ध संघसंस्थाका प्रतिनिधि र पत्रकार सहित समावेश भएको टोली पोखराको लेकसाइडबाट सिद्धार्थराजमार्ग हुदै भैरहवा पुगेको छ । जाउँ है पोखरा अभियानमा सहभागी टोली ६ दिनसम्म विभिन्न कार्यक्रसहित नेपालगन्ज, धनगढी हुदैं महेन्द्रनगरसम्म पुगेर पोखरा फर्कनेछ ।
टोलीमा सहभागी पर्यटकीय संघ संस्थाको छाता संस्था पोखरा पर्यटन परिषदका अध्यक्ष पोमनारायण श्रेष्ठले पोखरामा पछिल्लो समयमा पर्यटन आगमनमा केही बृद्वी भएको बताउदै यस्ता कार्यक्रमले प्रर्वद्धनमा थप टेवा पुग्ने बताए ।
यस्ता अभियानकै कारण पोखरामा पछिल्लो समय आन्तरिक पर्यटन चलायमान भएको बताउँदै उनले अबका दिनमा पोखराबाट पूर्व र पश्चिमका विभिन्न जिल्ला र ति जिल्लाहरुबाट पोखरामा पर्यटक आदानप्रदानका लागि अभियान उपयोगी हुने अपेक्षा प्रकट गरे ।
अभियानमा अन्तर्गत पुग्ने स्थानमा पत्रकार सम्मेलनका साथै सरोकारवाला पक्षसँग अन्तरक्रिया गरिने महासचिव राजेन्द्र ढकालले जानकारी दिए ।
