काठमाडौं ।

संसदमा प्रमुख प्रतिपक्षी दल नेपाली कांग्रेस संसद् समन्वय बोर्डको पहिलो बैठक आज (मंगलबार) बस्दै छ । बैठक दिउँसो ३ बजे बस्ने पार्टी कार्यालयका कार्यवाहक मुख्यसचिव कृष्ण दुलालले जानकारी दिए ।

उनका अनुसार नेपाली कांग्रेस संसदीय दलको विधान (संशोधन र परिमार्जनसहित, २०८३) को धारा २१ बमोजिम गठन भएको बोर्डको बैठक बस्न लागेको हो । बैठकमा बोर्डका सदस्यहरूको उपस्थिति रहने उनले बताए ।

पार्टीभित्र संसद्सम्बन्धी काम, रणनीति र समन्वयका लागि कांग्रेसले बोर्ड गठन गरेको छ । पार्टी प्रवक्ता देवराज चालिसेका अनुसार, पार्टी सभापतिले बोर्डको नेतृत्व गर्नेछन् ।

प्रतिनिधिसभा र राष्ट्रियसभाका संसदीय दलका नेता, उपनेता, प्रमुख सचेतक, सचेतकहरू र महामन्त्रीहरू बोर्डमा रहन्छन् । संसदीय समितिमा रहेका प्रमुख, कांग्रेस नेता र वरिष्ठ नेताहरूलाई पनि आवश्यकताअनुसार बोर्डमा रहने व्यवस्था छ ।