पोखरा ।
राष्ट्रियसभाका १८ जना रिक्त सदस्य पूर्तिगर्न सात वटै प्रदेशमा अहिले मतदान जारी छ । बिहान ९ः०० देखि दिउँसो ३ बजेसम्म मतदान गर्ने समय तय भए बमोजिम सबै प्रदेशका मतदान केन्द्रमा मतदान जारी रहेको निर्वाचन आयोगले जानकारी दिएको हो ।
राष्ट्रियसभामा आगामी २० फागुन देखि १८ सदस्य रिक्त हुँदैछन् । त्यसका लागि आज मतदान भएको हो । कोसी प्रदेशमा खस आर्यतर्फको एउटा पदमा निर्विरोध भएको छ । रिक्त हुन लागेका बाँकी १७ पदका लागि आज निर्वाचन जारी रहेको आयोगका प्रवक्ता नारायणप्रसाद भट्टराईले जानकारी दिए ।
कोसी प्रदेशका खस आर्यतर्फका उम्मेदवार नेपाली कांग्रेसका सुनिलबहादुर थापा निर्विरोध निर्वाचित भइकेका छन् । बाँकी १७ पदको मतदानका लागि सातै प्रदेशका मतदानस्थल तथा मतदान केन्द्र निर्धारण गरिएको छ ।
गण्डकी प्रदेशको प्रदेश निर्वाचन कार्यालय परिसर पोखरा कास्की, कोसी प्रदेशको प्रदेश निर्वाचन कार्यालय परिसर विराटनगर मोरङ, मधेस प्रदेशको महेन्द्रनारायण निधि मिथिला संस्कृति केन्द्र जनकपुर उपमहानगरपालिका–४ धनुषा, बागमती प्रदेशको भुटनदेवी माध्यमिक विद्यालय हेटौँडा उपमहानगरपालिका–४ मकवानपुरमा मतदान केन्द्र निर्धारण गरिएको हो ।
त्यसैगरी लुम्बिनी प्रदेशको कर्मचारी मिलन केन्द्र घोराही दाङ, कर्णाली प्रदेशको प्रदेश निर्वाचन कार्यालय परिसर वीरेन्द्रनगर सुर्खेत र सुदूरपश्चिम प्रदेशको प्रदेश निर्वाचन कार्यालय परिसर धनगढी कैलालीमा मतदान भइरहेको प्रवक्ता भट्टराईले जानकारी दिए ।
राष्ट्रियसभा सदस्य निर्वाचनका लागि प्रदेशसभा सदस्य, नगरप्रमुख तथा उपप्रमुख एवं गाउँपालिकाका अध्यक्ष तथा उपाध्यक्ष मतदाता रहने व्यवस्था छ ।
