पोखरा ।
गुल्मीको कालीगण्डकी गाउँपालिका–२ दबौखानीमा बुधबार दिउँसो स्कारपियो दुर्घटना हुँदा ६ जनाको ज्यान गुमेको छ । जिल्ला प्रहरी कार्यालय गुल्मीका अनुसार दुर्घटनामा तीन जना घाइते भएका छन् ।
जिल्ला प्रहरी कार्यालय गुल्मीका इनिस्पिेक्टर सुदीप नेपालीका अनुसार स्याङ्जाको चिरकोटबाट गुल्मीको राक्सेतर्फ जाँदै गरेको बा ०२२० नम्बरको स्कारपियो दिउँसो करिब ४ बजे कालीगण्डकी करिडोर सडकखण्डअन्तर्गत दबौखानीमा अनियन्त्रित भई सडकबाट करिब २५० मिटर तल खसेको खसेर दुर्घटना भएको हो ।
दुर्घटनामा परि स्कारपियो चालक स्याङ्जाको वालिङ नगरपालिका–२ का ६७ वर्षीय दिलिप कुमार बगाले, वालिङ–१० का ६० वर्षीय शिव पराजुली, गुल्मी कालीगण्डकी गाउँपालिका–१ सिरकोट घर भई हाल वालिङ बस्दै आएका लोकनाथ पाण्डे, सोही ठाउँकी सिता पाण्डे र बुटवल खैरेनी बस्दै आएका कुलानन्द पाण्डेको घटनास्थलमै तथा निता बगालेको कालीगण्डकी सामुदायिक अस्पताल मिर्मीमा उपचारका क्रममा ज्यान गुमेको हो ।
दुर्घटनामा गुल्मी कालीगण्डकी–१ सिरकोटका छविलाल पाण्डे, गोमता पाण्डे र स्याङ्जा वालिङ–१० का बालकृष्ण सुवेदी घाइते भएका छन् । गम्भीर घाइते छविलाललाई मिर्मीमा प्रारम्भिक उपचारपछि पाल्पास्थित मिसन अस्पताल रेफर गरिएको छ । यस्तै गोमताको मिसन अस्पताल पाल्पा र बालकृष्णको पोखरास्थित मणिपाल शिक्षण अस्पतालमा उपचार भइरहेको छ ।
प्रहरी र स्थानीयको टोलीले घटनास्थलबाट घाइते तथा मृतकहरूको उद्धार गरी अस्पताल पुर्याएको थियो । दुर्घटनाको स्पष्ट कारण खुल्न नसकेको र घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।
