काठमाडौं ।
साताको पहिलो कारोबार दिन सोमबार नेपाल स्टक एक्सचेञ्ज (नेप्से) परिसूचकमा गिरावट आएको छ। गत साता सुधारको लयमा देखिएको बजार आज पुनः ओरालो लागेको हो।
नेप्से परिसूचक आज ३३.२८ अंकले घटेर २,७०१.३२ विन्दुमा झरेर रोकिएको छ। आज बजार खुलेदेखि नै गिरावटको क्रम जारी थियो। समग्रमा परिसूचक १.२१ प्रतिशतले घटेको छ।
सोमबार कुल ३६० कम्पनीका १ करोड ३९ लाख २५ हजार ३३७ कित्ता शेयर किनबेच हुँदा कुल ६ अर्ब ८ करोड ८६ लाख रुपैयाँ बराबरको कारोबार भएको छ। आज बजारमा कुल ६९ हजार ८०३ वटा कारोबार भएका छन्।
आज कुल ३६ कम्पनीको शेयर मूल्यमा वृद्धि भएको छ भने २३४ कम्पनीको मूल्य घटेको छ। बाँकी ५ कम्पनीको शेयर मूल्य भने स्थिर रहेको नेप्सेले जनाएको छ।
