काठमाडौं ।
प्रमुख प्रतिपक्ष दल नेपाली काँग्रेसकी सांसद हरिनादेवी कामीले होल्डिङ सेन्टरमा आश्रय लिइरहेका सुकुमबासीहरूलाई ५ दिनभित्र हटाउने अमानवीय अल्टिमेटम तत्काल फिर्ता लिन सरकारसँग माग गरेकी छन् । बिहीबार प्रतिनिधि सभा बैठकको सुरुमा बोल्दै उनले उक्त माग गरेकी हुन् ।
सांसद कामीले सरकारले सुकुमबासीहरूको समस्या समाधानका लागि तत्काल कार्ययोजना सार्वजनिक गर्नुपर्नेमा जोड दिइन् । सरकारले सुकुमबासीहरूको समस्या नगद बाँडेर अस्थायी रूपमा समाधान गर्न खोज्न नहुने र उनीहरूलाई सुरक्षित आवाससहितको व्यवस्था गर्नुपर्ने उनको भनाइ थियो ।
सांसद कामीले संसदमा बोल्दै भनिन्, ‘५ दिन भित्र आश्रय खाली गर्न दिइएको अल्टिमेटम फिर्ता लिइयोस्। अर्को अस्थायी रूपमा नगद बाँडेर जिम्मेवारीबाट पन्छिने होइन, उनीहरूलाई सुरक्षित आवास र दीर्घकालीन समाधानको कार्ययोजना तत्काल सार्वजनिक गरियोस् ।’ उनले लगतबाट छुटेका वास्तविक सुकुमबासीको निष्पक्ष पहिचान गरी उनीहरूलाई पनि सम्मानसहित राहतको व्यवस्था गर्न माग गरेकी छन् ।
बैठकमा बोल्ने क्रममा सांसद कामीले प्रधानमन्त्री बालेन्द्र साह संसदप्रति जवाफदेही नभएको भन्दै आक्रोश समेत व्यक्त गरिन् । सुकुमबासीहरूको दीर्घकालीन व्यवस्थापनका लागि सरकार गम्भीर हुनुपर्ने उनको भनाइ थियो ।
