नयाँ दिल्ली ।
बुधवार उत्तर प्रदेशका धेरै जिल्लाहरूमा भीषण आँधीबेहरी र वर्षाले विनाश मच्चाएको छ ।
हुरीले रूखहरू र बिजुलीका पोलहरू उखेलेर धेरै क्षेत्रमा विद्युत् आपूर्ति अवरुद्ध पारेको छ । विभिन्न जिल्लाहरूमा ९६ जनाको ज्यान गएको छ भने ५० भन्दा बढी घाइते भएका छन् । सबैभन्दा बढी मृत्यु वाराणसी, प्रयागराज र कानपुर डिभिजनमा भएको छ ।
माटोका घरहरू र टिनका सेडहरू उडाएका छन् । बालीनालीमा पनि गम्भीर क्षति पुगेको छ । भारी वर्षा र आँधीले सडक यातायात अवरुद्ध गरेको छ, धेरै क्षेत्रमा रूखहरू ढलेका छन् ।
मृत्यु हुनेमा भदोहीमा १८, मिर्जापुरमा १५, प्रयागराजमा १७, प्रतापगढ र बरेलीमा चार–चार, फतेहपुरमा १०, उन्नाव र बदायौंमा छ–छ, सीतापुर, रायबरेली, चन्दौली, कानपुर देहात, हरदोई र सम्भलमा दुई–दुई र कौशाम्बी, शाहजहाँपुर, सोनभद्र र लखीमपुर खेरीमा एक–एक जना छन् ।
२४ घण्टा भित्र पीडितहरूलाई क्षतिपूर्ति दिन मुख्यमन्त्रीको निर्देशन
मुख्यमन्त्री योगी आदित्यनाथले राज्यमा बेमौसमी वर्षा, आँधीबेहरी र चट्याङबाट भएको क्षतिको लागि क्षतिपूर्ति दिन निर्देशन दिएका छन् । २४ घण्टा भित्र राहत कार्य पूरा गर्नुपर्ने उनले बताए । मुख्यमन्त्रीले मृतकका शोकसन्तप्त परिवारप्रति समवेदना पनि व्यक्त गरे ।
उनले सबै जिल्लाका जिल्ला मजिस्ट्रेटहरू र अन्य विभागका अधिकारीहरूलाई घटनास्थलमा पुग्न र पीडितहरूलाई सबै सम्भव सहयोग प्रदान गर्न निर्देशन दिए । एजेन्सी
