पोखरा ।
पोखराको कालिकास्थान–पुँडीटार–लामेआहाल सडकको शिलान्यास गरिएको छ । विश्व बैंकको आर्थिक सहयोगमा निर्माण हुने तेस्रो परियोजना दोविल्ला–बाधमारा–तिक्लाङ्–बडहरकोट–लामगाडी–चापलाङ–उपल्लो पुडिँटार–तल्लो पुँडीटार–झिगटे (जनजागृति मावि) तगारेगौडा–तल्लो गगनगौंडा सडक अन्तर्गत उक्त सडकको मंगलबार पोखरा महागनरका प्रमुख धनराज आचार्य, सहरी विकास मन्त्रालयका सचिव मणिराम गेलाल र विश्व बैंकका एनइयुजिआइपी परियोजना हेर्ने टास्क टिम लिडर आवेवाओले संयुक्त शिलान्यास गरेका हुन् ।

महानगर प्रमुख आचार्यले स्थानीय अवरोधका कारण बाटो नबन्ने अवस्थाको सृजना हुन नदिने प्रतिबद्धता जाहेर गरे । ‘बाटो स्थानीय उपभोक्ताका लागि त हो नै, यो बाटो पोखरा जोड्ने अर्को लाइफ लाइन पनि भएकाले यसको निर्माणका क्रममा आउन सक्ने कुनै पनि प्रकारका स्थानीय अवरोध तत्काल समाधान गरिनेछन्,’ आचार्यले भने, ‘यसको समय पनि छोटो छ, स्थानीयले यसका आवश्यक सहजीकरण गरिदिनुहुनेछ ।’ उक्त क्षेत्रको सहरी पूर्वाधार निर्माण गर्दै जनजीवनलाई विकाससँग जोड्ने कुरामा महानगरपालिका प्रतिबद्ध रहेको उनले बताए ।

सहरी विकास मन्त्रालयका सचिव गेलालले सडक निर्माण कार्य तोकिए कै समयमा सम्पन्न हुने विश्वास व्यक्त गरे । यो पोखरा महानगरपालिकाको परियोजना भएकाले दायित्व पनि महानगर कै हुने र आवश्यक परेका बखत मन्त्रालयले आवश्यक सहजिकरण गरिदिने उनले बताए ।

महानगरका प्रमुख प्रशासकीय अधिकृत श्यामकृष्ण थापाले सडकको गुणस्तरीय निर्माणमा जोड दिए । विश्व बैंकका टास्क टिम लिडर आवेवाओले समय छोटो समय भएकाले तीव्र गतिमा काम अघि बढाउन अनुरोध गरे । पोखरा ३३ का वडाध्यक्ष रामचन्द्र अधिकारीले वडामा निर्माण हुन लागेको सडक निर्माण कार्यको निरन्तर निगरानी गरी आवश्यक सहजीकरण गर्ने प्रतिबद्धता जाहेर गरे ।

सडकको निर्माण कम्पनी आसिस निर्माण सेवा प्रालि, भरतपुरसँग सम्झौता भएको छ । ३ सय ९० दिनमा निर्माण सम्पन्न गर्ने गरी सम्झौता भएको हो ।

विश्व बैंकको ७७ करोड ६८ लाख ९२ हजार रुपैयाँ लागत सहयोगमा निर्माण हुने सडकको सेक्सन एक र दुई गरी २ खण्डमा काम हुनेछ । सडकको पहिलो सेक्सनमा वडा ३३ को कार्यालय देखी उपल्लो पुँडीटारसम्म ९.६२७ किमी र दोस्रो सेक्सनमा पहिलो सेक्सनको जक्सनदेखि तल्लो गगनगौंडा (पृथ्वीराज मार्ग) सम्म २.८१३ किमी सडक निर्माण हुनेछ ।

परियोजना अन्तर्गत करिब १२.४४ किमी सुविधासम्पन्न सडक निर्माण हुनेछ । ७ मिटर चौडाइको सडक अस्फाल्ट पिच हुनेछ । सडकको दायाँबायाँ ड्रेनसहितको २/२ मिटरको फुट ट्रयाक हुनेछ ।

सम्झौता पश्चात् परियोजनाको जोइन्ट सर्भे सुरु भइसकेको छ । ३ अर्ब आर्थिक सहायतामध्ये तालचोक वेगनास सडकको लगानीबाट बचेको रकम परिचालनका सम्बन्धमा विश्व बैंकले परियोजना प्रस्ताव गर्न आग्रह गरे बमोजिम नगर प्रमुख आचार्यले उक्त सडक स्तरोन्नतिलाई प्राथमिकतामा राखेका थिए ।