पोखरा ।
लमजुङमा पहिरोमा परी दुई जनाको ज्यान गएको छ ।
गएरातीदेखि परेको अविरल वर्षाको क्व्होलासोथार गाउँपालिका–३ बगुममा आज बिहान गएको पहिरोले तीनवटा घर बगाउँदा एक जनाको ज्यान गएको छ भने एकै परिवारका अन्य तीन जना बेपत्ता भएको लमजुङक सहायक प्रमुख जिल्ला अधिकारी / सुचना अधिकारी गोर्कण राज सुयालले केन्द्रभागलाई जानकारी दिए ।
पहिरोमा परी ज्यान गुमाउनेमा क्वहोलासोथार गाउँपालिकाका ६७ वर्षीय रुद्रमान गुरुङको घर पुरिदाँ उनको ज्यान गएको र उनकी बुहारी अन्दाजी ३७ वर्षीया पञ्चकुमारी गुरुङ, पञ्चकुमारीका २ छोरीहरू अन्दाजी ७ वर्षीया इच्छा र अन्दाजी ५ वर्षीया नम्रता गुरुङ बेपत्ता रहेको सुचना अधिकारी सुयालले बताए ।
सुचना अधिकारी सुयालको अनुसार क्व्होलासोथारमा तीन वटा घर परिरोले पुरिएको छ ।
यस्तै लमजुङको दोर्दी गाउँपालिकामा पहिरोले घर पुरिदाँ १६ वर्षीय विकल सुनारको ज्यान गएको छ ।
लगातारको वषासँगै आज बिहान पौने ५ बजे पहिरो आउँदा उनीहरुको ज्यान गएको हो । नेपाल आर्मी, सशस्त्र प्रहरी र नेपाल प्रहरीसँगै स्थानीयको सहयोगमा बेपत्ताको खोजी कार्य जारी रहेको छ । यद्यपि पानी परिरहेकाले खोजी कार्यमा कठिनाई भइरहेको सहायक प्रमुख जिल्ला अधिकारी सुयालले बताए ।
