कांग्रेसलाई लात हानेर बाहिरबाट ढुंगा हानेर कांग्रेस बद्लिन्न : गगन थापा

केन्द्रभाग मिडिया

तनहुँ ।

नेपाली कांग्रेसका महामन्त्री गगन थापाले कांग्रेसलाई लात हानेर बाहिरबाट ढुंगा हानेर नबदेलिने बताएका छन् ।

बदल्न कांग्रेसभित्रै बसेर संघर्ष गर्नुपर्ने बताउँदै थापाले हालै कांग्रेस छाडेर राष्ट्रिय स्वतन्त्र पार्टी प्रवेश गरेर तनहुँ १ मा उम्मेदवार बनेका स्वर्णिम वाग्लेलाई कांग्रेसलाई लात हानेर, कांग्रेसको झ्यालमा ढुंगा हानेर कांग्रेस बदलिन्छ भनेर प्रश्न गरेका छन् ।

तनहुँ १ मा उपनिर्वाचनमा कांग्रेसका गोविन्द भट्टराईले उम्मेदवारी दर्ता गरेपछि आयोजित कार्यक्रममा उनले कांग्रेसभित्र बदल्नुपर्ने कुरा यहीँ बसेर बदल्ने बताए ।

‘नेपाली कांग्रेसभित्र जे भइरहेको छ ठीक भइरहेको छैन, नेपाली कांग्रेसभित्र धेरै कुरा बदल्नुपर्नेछ’ उनले प्रश्न गरे, ‘तर कांग्रेसलाई लात हानेर बाहिरबाट कांग्रेस खराब भनेर ढुंगा हानेर, झ्याल फुटाएर कांग्रेस बदलिन्छ ? कांग्रेस बदल्न त्यहीँभित्र बसेर लड्नुपर्छ, संघर्ष गर्नुपर्छ ।’

यस्तै थापाले वाग्लेलाई टुरिस्ट उम्मेदवारको संज्ञा दिदैं तनहुँबासीले किन भोट दिने भन्दै प्रश्न गरेका छन् ।महामन्त्री थापाले भने, ‘घुम्दै घुम्दै आएका टुरिस्ट उम्मेदवारलाई यहाँका जनताले भन्नुपर्छ कांग्रेस जो आयो त्यसले बजाउने चोकमा राखेको मादल होइन ।’

  • २० चैत्र २०७९, सोमबार १६:२८ प्रकाशित