काठमाडौँ ।

विपक्षी चार दलीय समाजवादी मोर्चाको कार्यदल बैठक मङ्गलवार बस्ने भएको छ । प्रचण्ड प्रधानमन्त्रीबाट सत्ताच्युत भएपछि लामो समय निष्क्रिय रहेको मोर्चाको बैठक बुधवार बस्ने टुङ्गो लागेपछि कार्यदलको भोलि बस्न लागिएको हो । बैठक दिउँसो ३ बजे बस्ने कार्यदल सदस्य एवं नेपाल समाजवादी पार्टीका सहअध्यक्ष गङ्गानारायण श्रेष्ठले जानकारी दिए ।

साउन १ गते माओवादीको केन्द्रीय कार्यालय पेरिसडाँडामा बसेको बैठकले मोर्चाको गतिविधिबारे समीक्षा गरी १५ दिनभित्र प्रतिवेदन बुझाउन कार्यदललाई निर्देशन दिएको थियो । तर माओवादीले मोर्चालाई बेवास्ता गरेपछि बैठक बस्न सकेको थिए । अहिलेसम्म पनि प्रतिवेदन टुङ्गो नलागेको श्रेष्ठले बताए । यता ६ महिनापछि बस्न लागिएको मोर्चाको बैठकले विगतका कामको समीक्षा गरी सरकार विरोधी कार्यक्रम ल्याउनेबारे छलफल हुने श्रेष्ठले बताए ।

‘मोर्चाको बैठक पहिला २ गते बस्ने भनिएको थियो । पछि विप्लवजीले आफू बाहिर भएकाले ७ गते मात्र बैठक बस्ने भनिएको थियो । फेरि माघ २ गते नै बैठक बस्ने खबर आएको छ । कार्यदलको बैठकले प्रतिवेदन तयार गरी मोर्चाको बैठकमा पेस गर्नेछौं’, उनले भने ।

कार्यदलमा श्रेष्ठसहित माओवादीका महासचिव देव गुरुङ, नेकपा एकीकृत समाजवादीका वरिष्ठ नेता प्रमेश हमाल, नेकपाका प्रवक्ता खड्गबहादुर विश्वकर्मा रहेका छन् । आलोपालो प्रणाली अनुसार मोर्चाको नेतृत्व अहिले विप्लवले गरेका छन् ।