काठमाडौँ ।

गृहमन्त्री रमेश लेखकले नेपाली कांग्रेस र नेकपा एमालेको कार्यदल बनाएर संविधान संशोधनबारे छलफलको प्रक्रियालाई प्रारम्भ गर्ने बताएका छन् । मंगलबार नेपाल राष्ट्रिय दलित समाज कल्याण संघको नवौं राष्ट्रिय महाधिवेशन तथा ४२ औँ वार्षिक साधारण सभामा बोल्दै उनले सरकारले संविधान संशोधन गर्न आवश्यक गृहकार्य अघि बढाइसकेको भन्दै छिटै दुई दलीय कार्यदल बनाएर छलफल सुरु गर्ने बताएका हुन् ।

गृहमन्त्री लेखकले संविधान संशोधनका लागि राष्ट्रिय सहमति बनाउने जिकिर गरे । संविधानको समीक्षाका साथै विषयवस्तुको पहिचान गरेर संशोधनको प्रक्रिया अघि बढाइने उनले बताए । संविधान संशोधनका लागि भने केहि समय लाग्ने उनले धारणा राखे ।

गृहमन्त्री लेखकले समावेशितालाई कमजोर गर्न नभइ थप सुदृढ बनाउनका लागि संविधान संशोधन गरिने प्रतिबद्धता जनाए । संविधानको भावना अनुसारको कानुन बन्न नसकेकाले दलित समुदायको अधिकार प्रत्याभूत हुन नसकेको उनले उल्लेख गरे । दलित समुदायको अधिकार स्थापित गर्नका लागि थप कानुन निर्माण गर्ने उनको भनाइ छ ।