काठमाडौँ ।
नेकपा माओवादी केन्द्रको प्रदेशस्तरीय परामर्श समितिको बैठक बुधबारदेखि सुरु हुँदैछ ।
साउन ३१ गते सम्पन्न स्थायी समिति बैठकले केन्द्रीय समितिको पूर्ण बैठकको तयारीको सन्दर्भमा केन्द्रीय सदस्यहरू र प्रदेश पदाधिकारीका बिचमा व्यापक छलफलका लागि परामर्श बैठक बस्ने निर्णय गरेको थियो ।
सोही निर्णय अनुसार बागमती प्रदेशका केन्द्रीय सदस्यहरूको बैठक बुधवार बिहान ११ बजे केन्द्रीय कार्यालय पेरिसडाँडामा बोलाइएको प्रवक्ता एवं बागमती प्रदेशका इन्चार्ज अग्निप्रसाद सापकोटाले जानकारी दिए ।
सापकोटाका अनुसार बैठकमा अध्यक्ष पुष्पकमल दाहाल प्रचण्डसहित, वरिष्ठ उपाध्यक्ष, उपाध्यक्षहरू, महासचिव, उपमहासचिवहरू र प्रदेशका पदाधिकारीहरू सहभागी हुनेछन् । बैठकमा स्थायी समितिको निर्णय, परिपत्रसहितका प्रस्तावमाथि परामर्श लिइने उनले बताए । उक्त बिहीबार बैठक सम्पन्न हुनेछ ।
परामर्श समितिको बैठक अन्य प्रदेश र मोर्चा कमिटीहरूमा बैठक असोज ३ गतेसम्म चल्नेछ ।
कुन प्रदेशमा कहिले ?
उपत्यका विशेष तथा सम्पर्क समन्वय प्रदेशमा कार्यरत केन्द्रयीय समिति तथा प्रदेश पदाधिकारीहरूको बैठक भाद्र ७ र ८ गते ।
गण्डकी प्रदेशका केन्द्रीय समिति तथा प्रदेश पदाधिकारीहरूको बैठक भाद्र ९ र १० गते ।
सुदूरपश्चिम प्रदेशका केन्द्रीय समिति तथा प्रदेश पदाधिकारीहरूको बैठक भाद्र १२ र १३ गते ।
कर्णाली प्रदेशका केन्द्रीय समिति तथा प्रदेश पदाधिकारीहरूको बैठक भाद्र १४ र १५ गते ।
लुम्बिनी प्रदेशका केन्द्रीय समिति तथा प्रदेश पदाधिकारीहरूको बैठक भाद्र १६ र १७ गते ।
तीन वटै केन्द्रीय आयोगका सदस्यहरूको बैठक भाद्र १८ र १९ गते ।
मधेस प्रदेशका केन्द्रीय समितिहरूको बैठक भाद्र २२ र २३ गते ।
पूर्व, १ नं प्रदेशका केन्द्रीय समिति तथा प्रदेश पदाधिकारीहरूको बैठक भाद्र २४ र २५ गते ।
ज।व।श मोर्चामा कार्यरत पार्टी केन्द्रीय समितिहरू र केन्द्रीय विभागहरूमा कार्यरत पार्टी केन्द्रीय समितिहरूको बैठक भाद्र २७ र २८ गते ।
प्रवास प्रदेशमा कार्यरत पार्टी केन्द्रीय समितिहरू तथा प्रदेश पदाधिकारीहरूको बैठक भाद्र ३१ र आश्विन १ गते ।
ज्येष्ठ कम्युनिस्ट मञ्च र केन्द्रीय सल्लाहकारहरूको बैठक असोज २ र ३ गते ।
