काठमाडौँ ।
नेपाल पत्रकार महासङ्घले सदस्यता नवीकरण सम्बन्धी शुद्धीकरण मापदण्ड जारी गरेको छ । महासङ्घका महासचिव रोशन पुरीले शुद्धीकरण मापदण्ड पूर्णरुपमा कार्यान्वयनमा जोड दिँदै यस सम्बन्धमा १५ बुँदा सार्वजनिक गरेका छन् ।
मापदण्ड अनुसार कम्तिमा तीन वर्षदेखि पत्रकारिता क्षेत्रमा क्रियाशील नरहेका व्यक्तिको सदस्यता नविकरण नहुने भएको छ । पत्रकारिता क्षेत्रमा ३ वर्ष वा त्योभन्दा धेरै समयदेखि क्रियाशील नभएका व्यक्तिहरूलाई सदस्यबाट स–सम्मान बिदाइ गर्ने र आवश्यक परेको अवस्थामा मानार्थ सदस्यतामा रूपान्तरण गर्न शाखा समितिले आवश्यक निर्णय लिने मापदण्डमा उल्लेख छ
वैशाख २५ गतेसम्म केन्द्रीय समितिले सबै सदस्यको विवरण आफ्नो वेबसाइट, फेसबुक पेज, ट्विटरलगायतबाट सार्वजनिक गर्ने छ । उपलब्ध नाममा चित्त नबुझेमा उजुरी गर्नका लागि असार १० गतेसम्मको समय निर्धारण गरिएको पुरीले जानकारी दिए ।
यस्तै नयाँ सदस्यको हकमा हरेक शाखा समितिले जेठ १० गतेसम्म आवेदन लिने, आवेदनका क्रममा कहिलेदेखि कुन मिडियामा काम गरेको भन्ने प्रष्ट खुल्ने कागजात सङ्कलन गर्ने र विधानको व्यवस्थाको पूर्ण कार्यान्वयन गरेर व्यक्तिगत फाइल नै खडा गर्ने उनको भनाइ छ ।
मिडिया हाउसको व्यवस्थापक, बजार प्रतिनिधि, प्रशासनमा काम गर्नेहरूको सदस्यता नवीकरण नगर्ने र नयाँ सदस्यता पनि नदिने नीति पूर्णरुपमा लागू गर्ने जनाइएको छ ।
यस्तै जनप्रतिनिधि, निजामती स्थायी कर्मचारीलाई नयाँ सदस्यता पनि नदिने र सदस्य कायम रहेको अवस्थामा नवीकरण नगर्ने लगायतका विषय मापदण्डमा छन् ।
