काठमाडौं ।

एसीसी प्रिमियर कप क्रिकेटमा आज मलेसियामाथि नेपालले सहज जित निकालेको छ ।

भीम सार्की र कुशल मल्लले अर्धशतक बनाएपछि नेपालले मलेसियामाथि ६ विकेटको सहज जित निकालेको हो। भीम र कुशलले चौथो विकेटमा १ सय १२ रनको साझेदारी गरेपछि नेपालले २ सय ३६ रनको लक्ष्य ३६।२ ओभरमै पूरा गरेको हो ।

भीमले ७१ रन बनाए । नेपाल विजय भन्दा ५ रनको नजिकको समयमा आउट भएका भीमले ९८ बल खेली ५ चौका प्रहार गरे ।कुशलले अविजित ७० रन बनाए । उनले ४० बल खेली समान ५ चौका र छक्का प्रहार गरे । दीपेन्द्रसिंह ऐरी ३ बलमा ५ रन बनाई अविजित रहे ।

नेपालको सुरुआत भने राम्रो थिएन । आसिफ शेख पहिलो ओभरमै १ रनमा आउट भए । उनलाई मोहम्मद वाफिकले कट एन्ड बोल्ड गरे । कुशल भुर्तेल र भीमले दोस्रो विकेटमा ४८ रनको साझेदारी गरे । कुशलले ३१ बलमा ५ चौका र २ छक्कासहित ३८ रन बनाए ।

कप्तान रोहित पौडेलले पनि छिटो गतिमा रन बनाए । उनले ४३ बल खेली ५ चौकासहित ४२ रन बनाए ।