पाकिस्तानमा प्रहरी चौकीमा आतंककारी आक्रमण हुँदा १५ प्रहरीको ज्यान गएको छ।पाकिस्तानको खैबर पख्तुनख्वा प्रान्तमा रहेको एक प्रहरी चौकीमा विस्फोटक पदार्थ भरिएको गाडी ठोक्किएको र विस्फोटपछि कट्टरपन्थीहरु चौकीभित्र पसेर प्रहरीमाथि गोली प्रहार गरेको अन्तर्राष्ट्रिय समाचार एजेन्सीहरुले बताएका छन् ।

बन्नु मेडिकल एण्ड टिचिङ इन्स्टिच्युटका प्रवक्ता नोमान खानले मृतकको संख्या पुष्टि गरेको समाचार संस्था रोयटर्सले जनाएको छ। नोमानका अनुसार ज्यान गुमाउने सबै प्रहरी कर्मचारी हुन्। यसबाहेक, तीन जना घाइतेलाई पनि अस्पताल लगिएको छ। जसको अवस्था खतरामुक्त रहेको बताइएको छ।

यसअघि बन्नु रेन्ज प्रहरी अधिकारी सज्जाद खानको कार्यालयबाट जारी विज्ञप्तिमा फतेह खेल चौकीको भवनको भग्नावशेषबाट १२ जना प्रहरीको शव निकालिएको र तीन जनालाई जीवितै उद्धार गरिएको उल्लेख थियो।