काठमाडौं।
हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको सभापतिमा राष्ट्रिय स्वतन्त्र पार्टी (रास्वपा) का सांसद गणेश पराजुली चयन भएका छन् ।
समिति सभापतिका लागि मंगलबार उम्मेदवारी मनोनयनको कार्यतालिका निर्धारण भएको थियो । त्यसक्रममा सभापतिका लागि पराजुलीको मात्र उम्मेदवारी परेको थियो । निर्विरोध भएपछि बुधबार बसेको समितिको बैठकलाई सम्बोधन गर्दै पराजुलीले सभापतिमा आफूलाई प्रस्ताव गरी महत्वपूर्ण जिम्मेवारी सुम्पिएकोमा सबै सदस्यलाई धन्यवाद व्यक्त गरे ।
‘यहाँहरूले व्यक्त गर्नुभएको विश्वासलाई साझा सहकार्य, निष्पक्ष अध्ययन र परिणाममुखी कामबाट सार्थक बनाउने प्रतिबद्धता व्यक्त गर्दछु’, पराजुलीको भनाइ थियो ।
उनले समितिको जिम्मेवारीसँग विपद्मा आफन्त गुमाएका परिवारको पीडा, घरबार र जीविकोपार्जन गुमाएका नागरिकको भविष्य तथा जोखिममा रहेका बस्तीहरूको सुरक्षा जोडिएको स्मरण गराए ।
‘हिमालसहित सबै क्षेत्रमा जलवायु परिवर्तनको प्रभावको वैज्ञानिक अध्ययन गर्दै जलवायु न्यायका लागि नेपालको आवाज बलियो बनाउने र भविष्यमा मानवीय तथा भौतिक क्षति न्यूनीकरण गर्ने ठोस आधार निर्माण गर्नु हाम्रो साझा दायित्व हो’, पराजुलीको भनाइ छ ।
त्यसक्रममा सभापति पराजुलीले समितिको कार्यादेशलाई स्पष्ट कार्ययोजना, जिम्मेवारी बाँडफाँट र समयतालिकासहित अघि बढाई निर्धारित समयसीमाभित्र तथ्यमा आधारित, निष्कर्षपूर्ण, व्यावहारिक र कार्यान्वयनयोग्य प्रतिवेदन प्रतिनिधिसभासमक्ष प्रस्तुत गर्ने लक्ष्य हुने बताए ।
उनले समिति सदस्यहरूको विषयगत ज्ञान, अनुभव, प्रभावित क्षेत्रसँगको सम्बन्ध र सक्रिय सहभागिता आफूहरूको प्रमुख शक्ति हुने भन्दै सचिवालयका कर्मचारीको अनुसन्धान सहयोग, तथ्याङ्क सङ्कलन, अभिलेख व्यवस्थापन, समन्वय र प्रतिवेदन तयारीमा रहने भूमिका समेत उत्तिकै महत्त्वपूर्ण हुने बताए ।
