बागलुङ।
अविरल वर्षाका कारण कालीगण्डकी नदीमा बहाव बढेपछि नदीले गरेको कटान हेर्ने क्रममा ढिकबाट लडेर बागलुङमा एक जनाको ज्यान गएको छ।
पर्वतको जलजलास्थित फर्से गाउँ र बागलुङ नगरपालिका–४ ढोडेनी क्षेत्रमा भइरहेको नदी कटान हेर्न गएका बागलुङ नगरपालिका–४ ओढारचौरका ५५ वर्षीय चित्र गोतामेको ढिकबाट खसेर आइतबार बेलुका ज्यान गएको हो। जिल्ला प्रहरी कार्यालय बागलुङका प्रहरी उपरीक्षक फडिन्द्र प्रसाईंले घटनाको पुष्टि गरेका छन्।
यसैबिच बागलुङमा अविरल वर्षापछि आएको पहिरोमा परी हालसम्म १० जनाको ज्यान गएको छ भने एक जना बेपत्ता भएका छन्। पछिल्लो दुई दिनमा परेको अविरल वर्षाका कारण जिल्लामा ठूलो मानवीय क्षति पुगेको छ।
आइतबार मात्रै पहिरो र दुर्घटनामा परी नौ जनाको ज्यान गएको छ भने एक जना बेपत्ता भएका छन्। यसअघि शनिबार पहिरोमा परी एक जनाको ज्यान गएको थियो ।
प्रहरी प्रमुख प्रसाईंका अनुसार आइतबार तमानखोला गाउँपालिकामा पहिरोमा परी चार जनाको ज्यान गएको छ भने एक जना अझै बेपत्ता छन्। त्यसैगरी निसीखोला गाउँपालिकामा पहिरोमा परेर पाँच जनाको ज्यान गएको छ। राहत र उद्धार कार्यका लागि स्थानीय प्रशासन तथा प्रहरी टोली प्रभावित क्षेत्रमा खटिएको छ।रासस
