काठमाडौं ।
पृथ्वीराजमार्गको नागढुंगा–मुग्लिन सडकखण्डअन्तर्गत कृष्णभीरमा पहिरो पन्छाएर २५० मिटर लामो नयाँ ट्रयाक बनाइएको छ।
पहिरोले पूर्ण रूपमा ठप्प बनेको उक्त सडकमा यही भदौ २८ गतेदेखि नै परीक्षणका रूपमा साना तथा अत्यावश्यक सवारी साधन चल्न थालिसकेका छन्। अब आगामी असोज १ गते बिहीबारदेखि भने नियमित रूपमा दुईतर्फी नै यातायात सञ्चालन गरिनेछ।
बाढी र पहिरोले सडकको सुरक्षा पर्खाल नै भत्काएपछि अवरुद्ध बनेको कृष्णभीरमा पहाड खनेर नयाँ बाटो निकालिएको हो। भदौ १० गते बिहान आएको बाढीले कृष्णभीरको सुरक्षा पर्खालमा पहिलोपटक क्षति पुर्याएको थियो। त्यसपछि भदौ १४ गते आएको अर्को बाढीले उक्त पर्खाल पूरै भत्काइदिएपछि राजमार्गमा यातायात सेवा पूर्ण रूपमा ठप्प बनेको थियो।
सडक ठप्प भएलगत्तै पूर्वाधार विकास मन्त्रालयले सडक विभाग र नेपाल जियोटेक्निकल सोसाइटीका प्राविधिकहरूको सहयोगमा चार दिनसम्म द्रुत अध्ययन गराएको थियो। विज्ञहरूले कृष्णभीरको पहाड काटेर २५० मिटर लामो नयाँ ट्रयाक बनाउन पहिलो विकल्पका रूपमा सुझाव दिएका थिए।
प्राविधिक तथा विज्ञहरूबाट प्राप्त सोही सुझावका आधारमा भदौ १९ गतेदेखि सो क्षेत्रमा रुख कटान सुरु गरिएको थियो। त्यसपछि ३५ मिटर उचाइ र २० मिटर भित्रसम्म पहाड खनेर नयाँ ट्रयाक निर्माण गरिएको हो।
नयाँ ट्रयाक तयार पार्न प्राविधिकसहित ५० जनाको टोली निरन्तर खटिएको थियो। उनीहरूले दैनिक १२ देखि १६ घण्टासम्म लगातार काम गरेर १०औँ दिनमा ट्रयाक खोल्ने काम पूरा गरेका हुन्।
काम सुरु भएको १०औँ दिन अर्थात् भदौ २८ गतेदेखि नै परीक्षणका रूपमा ग्यास बुलेटसहित केही सवारी साधन सञ्चालन गराइएको थियो। त्यसयता सो खण्डमा बिहान र बेलुका अत्यावश्यक यातायात आवतजावत भइरहेको छ।
हाल उक्त सडकखण्डमा ग्राभेल गर्ने, नाली निर्माण गर्ने तथा सडकलाई थप मजबुत बनाउने काम तीव्र रूपमा भइरहेको छ। भोलिसम्म ग्राभेलको काम पूरा गरी असोज १ गते बिहीबार बिहानैदेखि दुईतर्फी यातायात सुचारु गर्ने तयारी छ। यसका लागि पूर्वाधार विकासमन्त्री सुनिल लम्साल आफैँ कार्यक्षेत्रमा निरन्तर खटिरहेका छन्।
