काठमाडौं ।
नेपाली कांग्रेस केन्द्रीय अनुशासन समितिको महत्त्वपूर्ण बैठक पार्टी मुख्यालय सानेपामा सुरु भएको छ। निवर्तमान सभापति शेरबहादुर देउवा पक्षका नेता एवं पूर्व कार्यवाहक सभापति पूर्णबहादुर खड्काले पार्टीभित्र समानान्तर गतिविधि सञ्चालन गरेको विषयमा छलफल गर्न यो बैठक बोलाइएको हो।
बैठकमा खड्कालाई अनुशासन उल्लङ्घनको मुद्दामा स्पष्टीकरण सोध्ने तयारी भइरहेको बुझिएको छ। पार्टीको आधिकारिक निर्णय विपरीत अनधिकृत रूपमा वक्तव्य जारी गरेको भन्दै अनुशासन समितिले खड्कालाई यसअघि नै सचेत गराइसकेको थियो।
गत सोमबार खड्काले कार्यवाहक सभापतिको हैसियतमा विज्ञप्ति जारी गर्दै पार्टीले गरेको क्रियाशील सदस्यता खारेजीको निर्णयप्रति आपत्ति जनाएका थिए। सोही विज्ञप्तिपछि पार्टीले अनुशासन समितिको आकस्मिक बैठक डाकेको हो।
१८ चैतमा बसेको समितिको बैठकले खड्काले पुनः कार्यवाहक सभापतिको हैसियत प्रयोग गरेमा कडा कारबाही प्रक्रिया अघि बढाउने निर्णय गरिसकेको थियो।
खड्काले पछिल्लो समय शृङ्खलाबद्ध रूपमा पार्टीको पदीय मर्यादा विपरीतका गतिविधि गरेको आरोप छ। उनले १४ चैतमा कार्यवाहक सभापतिको रूपमा विज्ञप्ति निकाल्दै पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउको विरोध गरेका थिए।
त्यतिमा मात्र सीमित नभई, उनले १७ चैतमा १४औँ महाधिवेशनबाट निर्वाचित केन्द्रीय कार्यसमितिको बैठक नै बोलाएर दुई दिनसम्म समानान्तर छलफल चलाएका थिए।
