नयाँ दिल्ली ।
भारतको महाराष्ट्रको संभाजीनगर क्यान्टोन्मेन्ट क्षेत्रको एक कपडा पसलमा भीषण आगलागी हुँदा सात जनाको ज्यान गएको छ।
आगलागीमा माथिल्लो तलामा बस्ने एकै परिवारका सात जनाको ज्यान गएको भारतीय सञ्चारमाध्यमहरुले जनाएका छन् । ज्यान गुमाउनेमा तीन महिला, दुई पुरुष र दुई बालबालिका रहेका छन्। बुधबार बिहान ३ बजे आगलागी भएको हो।
आगलागी भएको क्षेत्रमा धुवाँको ठूलो मुस्लो निस्किएको छ। आगलागी हुँदा मानिसहरु माथिल्लो तलामा सुतिरहेकाले उनीहरु तल झर्ने मौका पनि नपाएको उल्लेख गरिएको छ । जसका कारण सातै जनाको निसास्सिएर ज्यान गएको हो। आगलागीको जानकारी पाउनासाथ दमकलको गाडी घटनास्थलमा पुगेर आगो नियन्त्रणमा लिएको थियो।
आगलागी भएको भवनमा जम्मा १६ जना थिए। पहिलो तल्लामा ७ जना, दोस्रो तल्लामा ७ जना र तेस्रो तल्लामा २ जना थिए।
पहिलो तल्लामा रहेका सबैको ज्यान गएको छ। आगलागीको कारण भने अहिलेसम्म थाहा हुन सकेको छैन।
