धनगढी ।
कैलाली जिल्ला कारागारमा थुनामा रहेका डडेलधुरा घर भएका कैदीबन्दीको ज्यान गएपछि डडेलधुरा बजारमा तनाव उत्पन्न भएको छ। ज्यान गुमाउने प्रकरणको निष्पक्ष छानबिन गर्न माग गर्दै उद्योग वाणिज्य संघ डडेलधुराको नेतृत्वमा बजार बन्दसहितको आन्दोलन सुरु गरिएको हो।
भागेश्वर गाउँपालिका–५ निवासी २८ वर्षीय हरिश सिंह पालीको सोमबार सेती प्रादेशिक अस्पताल, धनगढीमा उपचारको क्रममा ज्यान गएको हो। बैंकिङ कसुरमा दोषी ठहर भई कारागारमा कैद सजाय भोगिरहेका पाली असार २ गते बिहान अचानक बिरामी परेपछि उपचारका लागि अस्पताल लगिएको थियो। तर, उपचारकै क्रममा उनको ज्यान गएको कैलालीका प्रहरी नायब उपरीक्षक तथा प्रवक्ता राजकुमार सिंहले जानकारी दिए।
प्रहरीका अनुसार पालीलाई बिहान ११ बजे अस्पताल भर्ना गरिएको थियो। सेती अस्पतालमा उपचारको क्रममा उनको ज्यान जोगाउन सकिएन। मृतकको शव अहिले अस्पतालकै शव गृहमा राखिएको छ भने घटनाको अनुसन्धान भइरहेको प्रहरीले जनाएको छ।
उता, पालीको मृत्युप्रति असन्तुष्टि जनाउँदै डडेलधुरा बजारमा मंगलबार बिहानैदेखि यातायात, व्यापार र अन्य सम्पूर्ण सेवा बन्द गरिएको छ। उद्योग वाणिज्य संघ डडेलधुराको अगुवाइमा स्थानीयले निष्पक्ष छानबिन र पीडित परिवारलाई न्यायको माग गर्दै सडक आन्दोलन सुरु गरेका छन्।
संघले मृत्युलाई शंकास्पद भन्दै सत्यतथ्य बाहिर ल्याउन माग गरेको छ।
