पोखरा ।

पोखरामा नेपाल टेलिकमका कपर केबुलका तार चोर्ने २ जना पक्राउ परेका छन् ।

यहि मंसिर २६ गते पोखरा महानगरपालिकाको विभिन्न स्थानहरुमा रहेका बिजुलीका पोलहरुमा रहेको टेलिकमका कपर केबुलका तारहरु चोरी भएको सूचनाको आधारमा वडा प्रहरी कार्यालय बगरबाट खटिएको प्रहरीले तारसहित दुई जनालाई पक्राउ गरेको जानकारी दिएको छ ।

पक्राउ पर्नेमा पोखरा महानगरपालिका वडा नम्बर २५ हेम्जा बस्ने ५८ वर्षीया लालबहादुर नेपाली र भारतको मोतिहारी बिहार घर भई हाल हेम्जा बस्ने ३९ वर्षीय श्यामनाथ जैसवाल रहेको जिल्ला प्रहरी कार्यालय कास्कीले जानकारी दिएको छ । उनीहरुलाई अस्ति बुधबार दिउँसो २ बजेको समयमा लामाचौरस्थित गोस्ते जाने सडक खण्डबाट प्रहरीले नियन्त्रणमा लिएको हो ।

प्रहरीले ग २ च ५३६ नम्बरको सुजुकी मारुती कारलाई शंका लागि चेक गर्दा उक्त कारको पछाडीको सिट तथा डिक्कीमा टुक्रा-टुक्रा रोलिङ गरेको अवस्थामा १०० पियर को १५३ मिटर, ७० पियरको १३ मिटर, ५० पियरको २८ मिटर, ३० पियर को १०४ मिटर र २० पियरको ३३ मिटर गरी जम्मा ३३१ मिटर कपर केबुल तार फेला परेको प्रहरीले जनाएको छ ।

उनीहरुमाथि चोरी तथा डाँका सम्बन्धी मुद्दामा अनुसन्धान भइरहेको प्रहरीले जनाएको छ ।