काठमाडौं ।
बलिउडका चर्चित गायक कृष्णकुमार कुननाथको मंगलबार राति कोलकातामा निधन भएको छ ।
केकेको नामले परिचित कुननाथको ५३ वर्षको उमेरमा हृदयघातको कारण मृत्यु भएको उनको उपचारमा संलग्न चिकित्सकले पुष्टि गरेको भारतीय सञ्चार माध्यमहरुले उल्लेख गरेका छन् ।
तमिल, तेलुगु, कन्नड, मलायालम, मराठी, बंगाली र गुजराती फिल्ममा गीत गाएका केके कलकत्ताको गुरुदास कलेजमा आयोजित एक कार्यक्रममा सहभागी हुन आएका थिए । यो लाइभ शो नजरुल मञ्चमा भइरहेको थियो। तर कार्यक्रमकै क्रममा उनको स्वास्थ्य बिग्रिएपछि उनी होटल फर्किएको बताइएको छ ।
स्वास्थ्यमा समस्या देखिएपछि उनलाई निजी अस्पतालमा पुर्याइइकोमा चिकित्सकले उनलाई मृत घोषणा गरेका हुन् ।
केकेले धेरै बलिउड फिल्मका लागि गीत गाएका छन् । ‘हम दिल दे चुके सनम’ मा उनले गाएका ‘तडप तडप के इस दिल से’ र ‘ओम शान्ति ओम’ मा ‘आँखों मे तेरी’ लाई दर्शकले अत्यधिक रुचाएका थिए। उनले फिल्म ‘हम दिल दे चुके सनम’ बाट बलिउडमा पार्श्व गायकको रूपमा आफ्नो करियर सुरु गरेका थिए ।
