काठमाडौं ।
नवनियुक्त गृहमन्त्री सुधन गुरुङले भ्रष्टाचारप्रति शून्य सहनशीलताको नीति अपनाउन निर्देशन दिएका छन् ।
शुक्रबार मन्त्रालयमा पदबहाली गरेपछि मन्त्रालयमा आयोजित स्वागत कार्यक्रममा मन्त्री गुरुङले सेवा प्रवाहलाई सहज बनाउँदै भ्रष्टाचारप्रति शून्य सहनशीलताको नीति अपनाउन निर्देशन दिएका हुन् । भ्रष्टाचार गरेको पुष्टि भए कसैलाई नछाड्ने उनको भनाइ छ ।
उनले आगामी पाँच वर्ष देशको पक्षमा गम्भीर भएर काम गर्ने भन्दै यसमा सबैको सहयोग आवश्यक रहने बताए । उनले आफू जनतालाई परिणाम दिने गरी काम गर्न मन्त्रालयको नेतृत्वमा आएको भन्दै एकद्वार प्रणालीबाट शीघ्र सेवा प्रवाह गर्ने व्यवस्था मिलाउन निर्देशन दिए । आफू बोलेर भन्दा पनि कामबाट नजिता देखाउने उनको भनाइ छ ।
मन्त्री गुरुङले सरकारका निर्णय कार्यान्वयन गर्दिन भन्ने छुट कसैलाई नभएको समेत बताए।
