काठमाडौं ।
आगामी फागुन २१ गते हुने प्रतिनिधिसभा निर्वाचनको निष्पक्षता र पारदर्शिता सुनिश्चित गर्न निर्वाचन पर्यवेक्षण समिति नेपालले देशभर ७७ वटै जिल्लामा ७०० पर्यवेक्षक परिचालन गरेको छ।
निर्वाचन ऐन, कानुन र आचारसंहिता पालनाको अवस्थाबारे सुक्ष्म अध्ययन र अवलोकन गर्न समितिले माघ २४ र २५ गते नै दक्ष पर्यवेक्षकहरूलाई दुईदिने विशेष प्रशिक्षण दिएर कार्यक्षेत्रमा खटाएको हो।
समितिले स्वयंसेवक, अल्पकालीन, दीर्घकालीन र विशिष्ट विज्ञ पर्यवेक्षकहरूलाई क्रमिक रूपमा परिचालन गर्ने तयारी गरिरहेको छ। यसै सिलसिलामा हाल ४० जना दीर्घकालीन पर्यवेक्षकहरूले निर्वाचनका सम्पूर्ण विधि र प्रक्रियालाई नजिकबाट नियालिरहेका छन्।
उनीहरूले निर्वाचन आयोग, नेपाल सरकार, राजनीतिक दल, सुरक्षा निकाय, उम्मेदवार र सार्वजनिक पद धारण गरेका व्यक्तिहरूले आचारसंहिता पालना गरेरनगरेको विषयमा कडा निगरानी गरिरहेका छन्।
विशेष गरी निर्वाचन प्रचार प्रसारमा हुने खर्च र त्यसको स्रोतबारे पनि पर्यवेक्षकहरूले गहिरो अवलोकन गरिरहेको समितिले जनाएको छ । सञ्चारकर्मी, सामाजिक संघसंस्था र मतदाता समेतको भूमिकालाई अनुगमनको दायरामा ल्याइएको छ।
समितिका अध्यक्ष श्रीकृष्ण सुवेदीले एक विज्ञप्ति जारी गर्दै निर्वाचनलाई कानुनसम्मत, शान्तिपूर्ण, स्वच्छ, निष्पक्ष, स्वतन्त्र, मर्यादित र मितव्ययी बनाउन सबै सरोकारवाला पक्षबाट सकारात्मक योगदानको अपेक्षा गरिएको उल्लेख गरेका छन्।
