पोखरा ।
दैनिक झण्डै दुई हजार सेवाग्राहीले सेवा लिने यातायात व्यवस्था कार्यालय सवारीचालक अनुमति पत्र कास्कीमा कर्मचारीको अभावले सेवा नै प्रभावित भएको देखिएको छ । बिहिबार कार्यालयमा सेवाका लागि लाइनमा भेटिएका पोखरा ५ पस्र्याङ बस्ने डोलेन्द्र ढकाल आफू कार्यलयमा आएको ६/७ घण्टा भएको तर काम गर्न नपाएको गुनासो गरे ।
रि–ट्रायलको लागि राजस्व बुझाएर फारम बुझाउन लाइन बसेका उनले राजसव बुझाउन आउने सेवाग्राहीलाई छिटो छरितो सेवा दिनुपर्नेमा आलटाल भइरहेको भन्दै आक्रोस पोखे । ‘म ६/७ घण्टादेखि लाइनमा छु । मजस्तै यो घाममा धेरैजना यसरी लाइनमा बसिरहनुभएको छ । हामी सरकारलाई राजस्व बुझाउन आएकाहरुलाई यसरी दुख दिन मिल्छ ?’ उनले प्रश्न गरे ।
त्यस्तै हेमजाबाट आएका रमेश शर्माले सेवाग्राही नै कता बसेर सेवा लिने भन्ने नै समस्यामा रहेको गुनासो सुनाए । ‘लाइन लामो छ । एउटा लाइन बसेर बल्ल बल्ल अब काम हुन्छ भन्ने बेला यहाँ होइन अर्कोमा जानुस भन्छन् । अनि फेरी त्यहाँ उस्तै’ उनले भने ।
सेवाग्राहीको चाप अत्याधिक रहेको तर, कर्मचारी संख्या थोरै हुँदा समस्या भएको ं कार्यलयका सुचना अधिकृत विष्णु थापाले स्विकार गरे । उनका अनुसार कार्यालयमा अस्थायी करारसहित ४० जनाको दरबन्दी हो । १६ बैशाखदेखि अस्थायी करारमा रहेका ७ जना कर्मचारीको करार अबधि समाप्त भएपछि उनीहरु बाहिरिएका र उनीहरुको ठाउँमा अन्य कर्मचारी मन्त्रालयले नपठाएको उनले बताए । उनका अनुसार ३३ जना कर्मचारीको स्थायी दरबन्दी भएपनि कार्यालयमा १७ जना स्थायी कर्मचारी छन् । दैनिक दुई हजारको हाराहारीमा आउने सेवाग्राहीलाई आलोपालो गरेर आफूहरुले सकेसम्म सेवा दिइरहेको उनले बताए ।
कार्यालय स्रोतले दिएको जानकारी अनुसार तीन जना कार्यालय सहयोगीलाई समेत कम्प्युटर अप्रेटरले गर्नुपर्ने काममा लगाइएको छ । जसले गर्दा भोलि कुनै कैफियत देखिए त्यसको अपजस बेहोर्नुपर्ने भयसमेत कर्मचारीमा छ । ‘कार्यालय सहयोगीको काम सरसफाई गर्ने, फाइलहरु सम्बन्धित शाखामा ल्याउने लैजाने हो । तर, उनीहरुलाई कम्प्युटरको जिम्मा दिइएको छ । भोलि केही कमी कम्जोरी भए जिम्मा कसले लिने प्रश्न छ । त्यति मात्र होइन कम्प्युटर अप्रेटरले गर्नेकाम कार्यालय सहयोगीले गर्दा स्वभाविक रुपमा केही ढिलासुस्ती हुने नै भयो’ ती कर्मचारीले भने ।
कार्यालय सहयोगीलाई नै कम्प्युटर अप्रेटरको जिम्मा लगाइएको बारे जिज्ञासा राख्दा कार्यालय प्रमुख मिलन बहादुर केसीले कार्य सम्पादनलाई सहज बनाउन एउटा फाँटमा कार्यरत कर्मचारीलाई अर्को फाँटमा खटाइएको भन्दै घुमाउरो जवाफ दिए । कार्यालय प्रमुख केसीले कर्मचारी अभाव बारे भौतिक पूर्वाधार तथा यातायात व्यवस्था मन्त्रालयमा मात्र नभएर प्रमुख सचिवसम्म लिखित र मौखिक गुनासो गर्दा समेत समस्या समाधान नभएको बताए । ‘कर्मचारी अभाव भयो । झ्याल झ्यालमा कर्मचारी राख्नुपर्छ । दरबन्दीको आधा कर्मचारीले सेवा दिन अप्ठ्यारो भयो भनेर मन्त्रालय र प्रमुख सचिवज्युलाई समेत लिखित र मौखिक आग्रह गरेँ । अझ अघिल्लो महिना मात्र दुईजना कर्मचारी पठाइदिएर यतिको सहज भएको हो । नत्र अवस्था झन खराव थियो,’ उनले भने ।
यता भौतिक पूर्वाधार विकास तथा यातायात व्यवस्था मन्त्रालय गण्डकीले भने यातायात व्यवस्था कार्यालय सवारीचालक अनुमति पत्र कास्कीमा कर्मचारी अभावकै कारण सेवाप्रवाहमा समस्या रहेको अस्विकार गरेको छ । सात जना कर्मचारीको करार अबधी थप्न स्रोत नभएको प्रतिक्रिया दिएको मन्त्रालयले काम नै भने नरोकिएको दाबी गरेको हो ।
मन्त्रालयका प्रवक्ता एवं उपसचिव प्रेम सुवेदीले आफू कार्यालय प्रमुखको सम्पर्कमै रहेको भन्दै सेवा नै प्रभावित हुनेगरी कर्मचारी अभाव नभएको दाबी गरे । । ‘म कार्यालय प्रमुखसंग सम्पर्कमै छु । कर्मचारी अभावले सेवाप्रवाहमा कुनै समस्या छैन । एउटा फाँटबाट अर्को फाँटमा पुगेर सेवा दिनु सामान्य हो’ उनले भने ।
