पोखरा ।
पर्यटकीय राजधानी पोखरामा लागू औषध नियन्त्रण महाअभियान सुरु भएको छ । जिल्ला प्रहरी कार्यालय कास्की र सामुदायिक प्रहरी सेवा जिल्ला समन्वय समिति कास्कीको आयोजना तथा कास्की जिल्लामा क्रियाशील सम्पूर्ण सामुदायिक प्रहरी सेवा केन्द्रहरुको सहकार्यमा सुरु भएको अभियानको गण्डकी प्रदेशका मुख्यमन्त्री सुरेन्द्रराज पाण्डेले उद्घाटन गरे ।
सो अवसरमा वोल्दै मुख्यमन्त्री पाण्डेले लागू औषध घरको मात्र समस्या नभइ समाज र राष्ट्रकै समस्या भएकाले यसको रोकथाम र नियन्त्रणका लागि समुदाय स्तरमै जनचेतना अभिवृद्धि गर्न आवश्यक रहेको वताए । गण्डकी प्रदेशमा ११ जिल्लाको तुलनामा कास्की जिल्लामा बढी मात्रामा लागुऔषधको कारोवार हुने गरेको बताउदै त्यसको न्युनिकरणका लागि सम्पूर्ण एकजुट हुन आवश्यक रहेको उनको भनाइ रहेको थियो ।
त्यस्तै गण्डकी प्रदेशका सामाजिक बिकास मन्त्री बिन्दु कुमार थापाले लागु औषध प्रयोगकर्ताका कारण परिवारमा कस्तो असर पर्छ भन्ने आफुले प्रत्यक्ष महशुस गरेको वताउदै समाजमा यसबारेमा सचेतना फैल्याउन आवश्यक रहेको बताए ।
त्यस्तै पोखरा महानगरपालिकाका प्रमुख धनराज आचार्यले पोखरामा लागुऔषध नियन्त्रणका लागि स्थानिय तहको तर्फबाट महानगरको तर्फबाट गर्नुपर्ने सहयोग गर्न आफु सधै तत्पर रहेको बताए । कास्कीका प्रमुख जिल्ला अधिकारी भरतमणी पाण्डेले लागु औषध नियन्त्रणका लागि सम्पूर्ण एकजुट भएर लाग्नुपर्नेमा जोड दिए ।
त्यस्तै जिल्ला प्रहरी कार्यालय कास्कीका प्रमुख प्रहरी उपरीक्षक श्यामबावु ओलियाले पछिल्लो समय पोखराका मेडिकल र औषधी ब्यवसायीहरुबाट औषधीको दुरुपयोग गरी बिक्री वितरण गर्ने काम बढेको बताउदै मेडिकल र औषधी ब्यवसायीहरुलाई सचेत गराउन सके लागु औषध नियन्त्रणमा थप मदत पुग्ने बताए ।
समुदाय प्रहरी साझेदारी कार्यक्रम अन्तर्गत नेपाल प्रहरी, स्थानीय तह, समुदाय, सामाजिक संस्था र विद्यालयहरुको साझोदारीमा आगामी ६ महिना सम्म अभियान सञ्चालन हुने सामुदायिक प्रहरी सेवा जिल्ला समन्वय समितिका अध्यक्ष भीम पराजुलीले जानकारी दिए ।
