पाेखरा ।
राष्ट्रिय हेमजा आलु महाेत्सवकाे १३ औं संस्करण २४ चैतबाट सुरू हुने भएकाे छ । सुन्दर गाँउ हेमजा जाँउ आलुका स्वादिष्ट परिकार खाँऔ, आलु एक परिकार अनेक भन्ने मुल नाराका साथ विष्णुपादुका क्लव हेमजाकाे आयाेजनामा हुन लागेको महाेत्सवकाे तयारी अन्तिम चरणमा पुगेकाे साेमबार पत्रकार भेटघाट कार्यक्रम मार्फत जानकारी दिइएको हाे ।
आयोजक विष्णुपादुका क्लबका अध्यक्ष वसन्त कुमार श्रेष्ठले विदेशमा परिचित गराई हेमजाकाे कृषि उत्पादन तथा विकासमा टेवा पुर्याउने, सामाजिक एकता साथै यहाँको कृषकलाई कृषि व्यवसायमा आकर्षित गराउने लक्ष्य सहित महाेत्सव आयाेजना गरिएकाे जानकारी दिए ।
हेमजामा उत्पादन भएका आलु तथा अन्य ताजा तरकारीको वृहत् प्रदर्शन तथा प्रचार प्रसार गर्ने, हेमजालाई व्यवसायीक कृषि पर्यटनको रुपमा देश विदेशमा चिनाउने, व्यवसायीक कृषि खेती सञ्चालन गर्न सहयाेग तथा अभिप्रेरित गर्ने तथा क्लबकाे भवन निर्माणका साथै तरकारी संकलन तथा बिक्री वितरण केन्द्र निर्माण गरने महाेत्सवकाे उदेश्य रहेकाे उनले बताए ।
महोत्सवमा आलुका परिकार स्टल, व्यवसायिक स्टल, कृषि प्रविधि प्रदर्शनी रहने आयोजकले जनाएको छ ।महोत्सवको मुख्य आकर्षणको रुपमा आलु तथा ताजा तरकारीहरुको वृहत प्रदर्शनी, आलुको ठुलो पहाड, आलुका विभिन्न परिकार, कृषकका लागि माटाे, वाेट बिरुवा परिक्षण तथा राेग निधान, कृषक र कृषि सम्वन्धि बिबिध सांस्कृतिक कार्यक्रम, कृषि झाँक्री प्रतियाेगिता, चर्चित कलाकारहरुकाे प्रस्तुति, विभिन्न कृषि विउ विजन तथा अन्य कृषि यन्त्रहरुको प्रदर्शनी रहने आयाेजकले बताएकाे छ । महाेत्वमा विक्रीकालागि ४० मेट्रिक टन आलु तयारी अबस्थामा राखिएकाे छ । महाेत्सव स्थलमा बढीमा ४२ रूपैयाँ प्रति केजीका दरले आलु किन्न पाइनेछ ।
हेमजाकाे ५९० हेक्टरमा आालु उत्पादन गरिने गरेकाे छ । एक हजार ५० कृषकले व्यावसायिक आलु उत्पादन गर्ने गरेका पत्रकार भेटघाट कार्यक्रममा जानकारी दिइएकाे छ ।
पत्रकार भेटघाट कार्यक्रममा बाेल्दै पोखरा महानगरका प्रवक्ता समेत रहेका पोखरा २५ का वडाध्यक्ष मोतिराज तिमिल्सिनाले महाेत्सवले हेमजा र सिंगाे पाेखरालाई अन्तर्राष्ट्रिय रूपमा चिनाउन सफल भएकाे बताए । उनले महाेत्सवले पाेखरा भ्रमण वर्ष २०२५लाई सफल बनाउन महत्त्वपूर्ण भुमिका खेल्ने अपेक्षा राखे ।
पत्रकार भेटघाट कार्यक्रममा प्रधानमन्त्री कृषि आधुनिकीकरण परियाेजना कास्कीका प्रमुख माधव लम्साल, कृषि ज्ञान केन्द्र हेमजाका प्रमुख रामकृष्ण अर्याल, पत्रकार महासंघ कास्कीका उपाध्यक्ष माधव रेग्मी र महासचिव हिक्मत थापा लगायतले महाेत्सवकाे बारेमा जानकारी दिएका थिए ।
