काठमाडौँ ।
काठमाडौँको गोकर्णेश्वर नगरपालिका–८ स्थित माकलबारीमा एक युवकको हत्या भएको छ । एक लाख लेनदेनको विवादमा एक युवकको हत्या भएको र उनको गाडिएको अवस्थामा शव भेटिएको प्रहरीले बताएको छ ।
माकलबारीमा सञ्चालित आरके मोटरसाइकल वर्कसपमा १९ वर्षीय राहुल साहको हत्या भएको जिल्ला प्रहरी परिसर काठमाडौँका एसपी अपिल बोहराले बताए । हत्यामा संलग्न आरोपमा प्रहरीले वर्कसप सञ्चालकसहित ६ जनालाई पक्राउ गरेको छ ।
गोकर्णेश्वरको बाहुनधारा बस्ने साह चैत ११ देखि सम्पर्कबिहीन थिए । चैत १५ मा हत्या गरेर वर्कसप पछाडिको जमिनमा गाडेको अवस्थामा शव भेटिएको एसपी बोहराले जानकारी दिए ।
हत्यामा संलग्न आरोपमा पक्राउ पर्नेमा वर्कशप सञ्चालक सर्लाही घर भएका २२ वर्षीय निप मण्डल, १८ वर्षीय बिजय यादव, १८ वर्षीय करन कुमार महतो, २३ वर्षीय जोधन मण्डल, ४५ वर्षीय उत्तम मण्डल र भारत घर भएर दक्षिणढोका बस्ने २९ वर्षीय सुनिल शर्मा छन् ।
१ लाख १० हजार रुपैयाँ लेनदेन विवादमा उनको हत्या भएको अनुसन्धानमा संलग्न एकजना अधिकृतले जानकारी दिए ।
