काठमाडौं ।
म्यानमारमा शक्तिशाली भूकम्पमा परी १४४ जनाको ज्यान गुमेको छ। शुक्रबार दिउँसो तीन बजे म्यानमारको राजधानी नेपिडो आसपास केन्द्रबिन्दु भएर ७.७ म्याग्नेच्युडको भूकम्प गएको थियो ।
प्रारम्भिक रिपोर्टहरूका अनुसार भूकम्पमा परी १४४ जनाको ज्यान गुमेको बिबिसीले जनाएको हो । भूकम्पले राजधानीमा सयौं घरहरू ढलेको र त्यसको भग्नावशेषमा सयौं मानिसहरू पुरिएको हुनसक्ने भएकाले ज्यान गुम्नेको संख्या धेरै बढ्न सक्ने बताइएको छ ।
म्यानमारको दोस्रो ठूलो सहर मन्डालेमा पनि भूकम्पले अग्ला अग्ला भवनहरूमा क्षति पुगेको छ । त्यहाँ पनि मानिसहरूको ज्यान गुमेको हुनसक्ने बताइएको छ ।
भूकम्पको धक्का थाइल्याण्डको बैंकक, चीन र भारतमा समेत महशुस भएको थियो । थाइल्याण्डको बैंककमा रहेको एउटा गगनचुम्बी भवन गर्ल्यामगुर्लुम्म ढलेको थियो । त्यहाँ काम गर्ने सय जना भन्दा बढी मजदुर बेपत्ता रहेको बिबिसीले जनाएको छ ।
म्यानमारका ६ सहरहरूमा आपतकाल घोषणा गरिएका छन् । त्यहाँ रातभरि पनि उद्दार कार्य भएको बताइएको छ ।
मुख्य मुख्य सहरहरूमा विद्युत आपूर्ति पनि अवरूद्ध हुँदा रातको समयमा उद्धारमा समस्या भएको थियो । ७.७ म्याग्नेच्युडको भूकम्पपछि ६.२ म्याग्नेच्युडको परकम्प गएको थियो । त्यसले पनि थप क्षति पुर्याएको छ ।
भूकम्पपछि मानिसहरू चिच्याउँदै सडकमा निस्किएका थिए । धेरै ठाउँहरूमा सडक समेत बीचबाट चिरिएको तस्बिरहरू सार्वजनिक भएका थिए ।
म्यानमारका अस्पतालहरु भूकम्पमा परी घाइते भएकाहरूले भरिएका छन् । -बीबीसी
