पोखरा ।
पृथ्वीनारायण क्याम्पसको स्वतन्त्र विद्यार्थी युनियन (स्ववियु) अध्यक्षमा अनेरास्ववियुका विष्णु पोखरेल निर्वाचित भएका छन् । उनी एक हजार १०५ मत सहित निर्वाचित भएका हुन् । उनका निकटतम प्रतिस्पर्धि नेविसंघका सुशिल न्यौपानेले ५०३ मत ल्याए ।
अध्यक्षका अन्य प्रतिस्पर्धीहरु स्वतन्त्र उम्मेदवारी दिएकी विप्लवी न्यौपानेले ४६९, अखिल क्रान्तिकारीका नविन अधिकारीले २२३, संयुक्त प्यानलका सन्तोष पौडेलले १९६, स्वतन्त्र उम्मेदवारी दिएका कमल सुवेदीले ९९, प्राज्ञिक विद्यार्थी परिषदका दिप्सन गुरुङले ७६ र अखिल छैठौंका मिलन सुनारले २८ मत प्राप्त गरेका छन् ।
सचिवमा अनेरास्ववियुका विराट दुवाडी निर्वाचित भएका छन् । उनले एक हजार ४१३ मतसहित सचिवमा निर्वाचित भएका हुन् । उनका निकटतम प्रतिस्पर्धी नेविसंघका विवेक भट्टराईले ६२८ मत ल्याएका छन् । सचिवका अन्य प्रतिस्पर्धी अखिल क्रान्तिकारीका मिराज थापामगरले २९३, संयुक्त प्यानलका किरण खड्काले २४९ र प्राज्ञिक विद्यार्थी परिषद्का अविशेष विष्टले ११८ मत प्राप्त गरे ।
कोषाध्यक्षमा अनेरास्ववियुकी सन्दिका गुरुङ निर्वाचित भएकी छन् । उनले एक हजार ३०४ मत ल्याएर विजयी हुँदा उनका निकटतम प्रतिस्पर्धी नेविसंघका अमिषा यादवले ६६७ मत ल्याइन् । अन्य प्रतिस्पर्धी संयुक्त प्यानलका सचिन पौडेल ३६०, अखिल क्रान्तिकारीका सिर्जना शर्माले २४४ र प्राज्ञिक विद्यार्थी परिषदका अम्बिका धिमालले १२४ मत ल्याइन् ।
निर्वाचन समितिले निर्वाचित भएको औपचारिक घोषणा भने गर्न बाँकी छ ।
