पोखरा ।
आगामी चैत्रको अन्तिम साता पोखरामा तेश्रो एबिसी फोर्टी फाइभ प्लस राष्ट्रिय एट ए साइड खुल्ला भेट्रान्स फुटवल प्रतियोगिता हुने भएको छ । आपसी सद्भाव, स्वास्थ्य र भाइचाराका लागि फुटवल भन्ने नाराका साथ स्थापित अमरसिंह ब्वाइज क्लब एबिसीले आगामी चैत्रको २७ देखि ३० गते सम्म पोखरा रंगशालामा तेश्रो फोर्टी फाइभ प्लस एट ए साइड खुल्ला भेट्रान्स फुटवल प्रतियोगिताको आयोजना गर्न लागेको हो ।
शनिवार पत्रकार सम्मेलनको आयोजना गरी आयोजक एबिसी क्लबले तेश्रो संस्करणको प्रतियोगिताको तयारी तीब्र पारिएको जनाएको छ ।नेपाल भरबाट १४ टीमको सहभागीता रहने उक्त प्रतियोगितामा प्रथम हुने टीमले नगद १ लाख ५५ हजार ५ सय ५५, शिल्ड, मेडल र प्रमाणपत्र र उपबिजेताले ७७ हजार ७ सय ७७, शिल्ड, मेडल र प्रमाणपत्र पाउने छन । प्रतियोगितामा वेष्ट प्लेयर अवार्डको समेत ब्यवस्था गरिएको छभने खेल अवलोकन गर्ने दर्शकलाई निशुल्क ब्यवस्था गरिएको छ ।
खेलकुदको माध्यमबाट स्वच्छ समाजको लागि स्वस्थ मानसिकता, स्वस्थ मानसिकताका लागि स्वस्थ शरीर, स्वस्थ शरीरका लागि खेलकुद र खेलकुदमा फुटवल भन्ने मान्यतालाई आत्मसाथ गर्दै समाजका सम्पूर्ण वर्गका जनशक्तिलाई शारीरिक तथा मानसिक रुपले जोशिलो बनाउदै दिगो बिकासको निमित्त खेलकुद मार्फत सकारात्मक सन्देश प्रवाह गरि युवा तथा वयस्क समुहलाई स्वच्छ समाजको निर्माण गर्ने उद्देश्यले एबिसी क्लबको स्थापना भएको हो ।
२०५४ सालमा स्थापना भएको अमरसिंह ब्वाइज क्लबले विभिन्न खेलकुद प्रतियोगिताको आयोजना गर्दै आइरहेको छभने समय सापेक्ष रुपमा विभिन्न विद्यालयहरुमा छात्रवृत्ति तथा खेलकुद सामाग्री वितरण, बाढीपहिरो तथा भुकम्प जस्ता विपदमा परेकाहरुको उद्धार तथा राहत वितरण संगै विभिन्न सामाजिक काम थर्दै आइरहेको क्लबका अध्यक्ष राजेश गुरुङले जानकारी दिए ।
