पोखरा ।
कालीगण्डकी बचाऔँ अभियानका अभियन्ता तथा संरक्षणकर्मी आर.के. अदिप्त गिरी सम्मानित भएका छन् । पर्वतको कुस्मामा आयोजित एक कार्यक्रममा उनलाई सम्मान गरिएको हो । वातावरण संरक्षणका लागि महाअभियान कास्कीले नागरिक समाज कास्कीको सहयोगमा गिरीको निवास कुश्माबजारमै पुगेर शुक्रबार सम्मान गरेको वातावरण संक्षणका लागि महाअभियान कास्कीका संयोजक रामबहादुर पौडेलले जानकारी दिए ।
उनका अनुसार गिरीलाई कालीगण्डकी बचाऔँ अभियानमार्फत जनचेतना जगाउनुका साथै प्राकृतिक, सांस्कृतिक एवं ऐतिहासिक सम्पदा तथा वातावरण संरक्षणमा पुर्याएको उल्लेखनीय योगदानका लागि ‘वातावरण तथा सम्पदा संरक्षण सम्मान’ द्वारा सम्मान गरिएको हो ।
गिरीलाई गण्डकी प्रदेशका मुख्य न्यायाधिवक्ता चिरञ्जीवी शर्मा, अभियानका संयोजक पौडेल र नागरिक समाज कास्कीका सहसंयोजक दुर्गाकुमारी शर्माले सम्मानपत्र, माला तथा र दोसल्ला ओढाएर सम्मान गरेका हुन् ।
सम्मान पछि बोल्दै मुख्य न्यायाधिवक्ता शर्माले सभ्यताको जननी नदीलाई भावी पुस्तासम्म जस्ताको तस्तै संरक्षण गर्नुपर्नेमा जोड दिए । उनले सरक्षणकमी गिरीले संरक्षणको क्षेत्रमा दिएको योगदान प्रशंसनीय रहेको बताए ।
संरक्षणकर्मी गिरीले कालीगण्डकी नदी एकाध व्यक्तिको स्वार्थका लागि कब्जा भइरहेको आरोप लगाउँदै यसविरुद्ध आवाज उठाउनुपर्ने बताए । ‘जीवनको स्रोत नै नदी हो, यसलाई बचाउन सबैले सङ्कल्प गर्नुपर्छ,’ उनले भने ।
