पोखरा ।
जिलेस्पीजंग कार्कीको निर्णायक गोलमा नेपालले अन्तर्राष्ट्रिय मैत्रीपूर्ण खेलमा सिंगापुरविरूद्ध ऐतिहासिक जित निकालेको छ । सिंगापुरको राष्ट्रिय रंगशालामा शुक्रबार भएको खेलमा नेपालले घरेलु टोली सिंगापुरलाई १-० गोलले पराजात गरेको हो ।
जितसंगै नेपालले सिंगापुरविरूद्ध पहिलो पटक इतिहास रच्न सफल भयो । मनिष डाँगीले दिएको पासमा जिलेस्पीजंग कार्कीले खेलको १२औं मिनेटमा गोल गरेका थिए । कार्कीले डिबक्सबाट उत्कृष्ट फिनिसिङ गरेका हुन् ।
फिफा वरीयतामा सिंगापुर नेपालभन्दा १५ स्थान माथि छ । सिंगापुर १६०औं स्थान तथा नेपाल १७५औं स्थानमा छन् । सिंगापुरविरूद्धको खेल नेपाली राष्ट्रिय टोलीका प्रशिक्षक म्याट रसका लागि पहिलो अन्तर्राष्ट्रिय खेल हो। उनले पहिलो खेलमा जित निकाल्न सफल भएका छन् ।
नेपाली टोली सिंगापुरसँग आज खेलेपछि मलेसिया जानेछ। मलेसियासँग नेपालले चैत १२ मा खेल्नेछ । मलेसियामा नेपालले एएफसी एसियन कप २०२७ को छनोट चरणको अन्तिम चरणको खेलमा प्रतिस्पर्धा गर्न लागेको हो। मलेसियाविरूद्धको यो खेल नेपालको घरेलु मैदानमा हुने भए पनि अन्तर्राष्ट्रिय मान्यताप्राप्त मैदानको अभावमा मलेसियामै हुन लागेको हो ।
