पोखरा ।
नेपाली नयाँ वर्षका अवसरमा पोखराको फेवाताल किनारमा फेवा नव वर्ष महोत्सवको २० औँ संस्करण हुने भएको छ ।
होटल संघ पोखराले नेपाली नयाँ वर्ष धुमधामका साथ मनाउन र आन्तरिक तथा बाह्य पर्यटक आकर्षित गर्न विविध सांस्कृतिक कार्यक्रमसहित महोत्सव गर्न लागेको हो ।
यही ३० चैत देखि आगामी १ वैशाखसम्म पर्यटकीय क्षेत्र ड्यामसाइडदेखि खहरेचोकसम्मको तीन किमी भन्दा धेरै सडक क्षेत्रमा महोत्सव हुने आयोजक होटल संघ पोखराका अध्यक्ष लक्ष्मण सुवेदीले जानकारी दिए ।
उनका अनुसार नव वर्ष महोत्सवलाई भव्य बनाउने तयारी भइरहेको छ । महोत्सवको प्रमुख उद्देश्य नेपाली मौलिक संस्कृतिको संरक्षण र परम्परागत नेपाली खानाको प्रवर्द्धन गर्नेसहित विविध सांस्कृतिक झाँकी, नृत्य र खानाका स्टल महोत्सवमा राखिने अध्यक्ष सुवेदीले जानकारी दिए ।
‘नेपालका मुख्य सहरमा अङ्ग्रेजी नयाँ वर्ष धुमधामका साथ मनाउने गरिएकामा नेपाली नयाँ वर्ष पनि उत्तिकै उल्लासका साथ मनाउन महोत्सवलाई निरन्तरता दिइएको हो’, अध्यक्ष सुवेदीले भने, ‘पर्यटनको राजधानी घोषणापछि दाेस्राे पटक पोखरामा हुन लागेको यस महोत्सवमा स्वदेशी तथा विदेशी पर्यटकलाई मनोरञ्जन प्रदान गर्नेछौँ ।’
महोत्सव आन्तरिक र बाह्य गरी तीन लाख पर्यटकलाई अवलोकन गराउने आयोजकको लक्ष्य छ । महोत्सव तयारीका लागि विभिन्न २१ वटा समिति गठन गरिएकाे छ । महाेत्सवकाे अवसरमा होटल संघ पोखरा मातहतका होटलहरुले प्रकाशित गरेको दररेटमा २० प्रतिशतसम्म छुट प्रदान गरिने निर्वतमान अध्यक्ष विकल तुलाचनले बताए ।
महोत्सवका आकर्षणमा परम्परागत नेपाली खानाको प्रवर्द्धन, सांस्कृतिक झाँकी, लोकदोहोरी, पप कन्सर्ट, स्थानीय कलाकारद्वारा सांस्कृतिक नृत्य, हास्यव्यङ्ग्य प्रहसन र पर्यटक दौड प्रतियोगितालगायत रहेका छन् । महाेत्सव सफल बनाउन हाेटल संघ पाेखराले जाउँ है पाेखरा लगायतका अभियान सञ्चालन गरेकाे छ ।
पर्यटन बोर्ड गण्डकीका प्रमुख मणिराज लामिछानेले महोत्सवले नेपाली संस्कृति संरक्षण र पर्यटन प्रवर्द्धनको साथै आर्थिक उन्नयनमा योगदान पुगेको बताए । अंग्रेजी नयाँ वर्षको सडक महाेत्सव जस्तै फेवा नववर्ष महाेत्सव सफल रहने अपेक्षा प्रकट गरे ।
हाेटल संघ केन्द्रका सदस्य एवं सल्लाहकार परिसद संयाेजक भरत पराजुलीले पर्यटन क्षेत्रमा सकारात्मक सन्देशकाे आवस्यकता आौँल्याए ।
पत्रकार महासंघ कास्कीका अध्यक्ष माधव बरालले महाेत्सवकाे सफलताकाे कामना गरे । संघका महासचिव राजेन्द्र ढकाल महाेत्सवकाे विविध पक्षका बारेमा जानकारी गराए ।
