पोखरा ।

हिमाल पारीको जिल्ला भनेर चिनिने मनाङको सदरमुकाम चामेसम्म अबको एक महिनासम्ममा बसमा चढेर यात्रा गर्न पाइने भएको छ । नेपाली नयाँ वर्ष १ बैशाखमा सार्वजनिक यातायातका रुपमा बस सञ्चालनको औपचारिक उद्घाटन गर्नेगरी तयारी अगाडि बढाइएको मनाङका प्रमुख जिल्ला अधिकारी मातृका आचार्यले जानकारी दिए । त्यसका लागि आफूले आइतबार समन्वयात्मक बैठक डाकेरै प्रक्रिया अगाडि बढाएको उनले जानकारी दिए । बैठकमा सुरक्षा निकायका प्रमुख, यातायात व्यवसायी समितिका पदाधिकारी, स्थानीय जनप्रतिनिधि तथा पूर्वाधार विकास कार्यालयका प्रमुखको सहभागिता थियो ।

बैठकले सार्वजनिक बस सेवा व्यवस्थित, सुलभ र सरल बनाउँदै स्थानीय बासिन्दा, पर्यटक तथा सरकारी कर्मचारीलाई सहुलियतपूर्ण तथा सहज रूपमा यात्रा सुनिश्चित गर्ने निष्कर्षसहित सो निर्णय गरिएको उनले जानकारी दिए । सार्वजनिक सवारीसाधन सञ्चालनले स्थानीयवासीका साथै पर्यटक र कर्मचारीलाई समेत सहज हुने उनले बताए ।

मनाङ मस्याङ्दी जलविद्युत आयोजना अगाडि बढेकाले त्यसका लागि चाहिने निर्माण सामग्रीसहति १० चक्के गाडी समेत जाने तर, सार्वजनिक यातायातको रुपमा बस सेवा सञ्चालन गर्न नसक्ने अवस्था राख्न हुन्ने भनेरै सार्वजनिक बस सेवा सुरु गर्ने निर्णय गरिएको प्रजिअ आचार्यले बताए । ‘प्राइबेट सेक्टर बाट १० चक्के सम्मका ढुवानीका साथ आउन मिल्ने तर, सार्वजनिक यातायातका साधनको रुपमा बस प्रयोग गर्न नमिल्ने हुँदैन भनेरै सार्वजनिक यातायातको रुपमा बस सेवा सुचारु गर्ने निर्णयमा पुगेका र्हौं’ उनले केन्द्रभागसंग भने, ‘यसका लागि केही कानूनी प्रक्रिया पूरा गर्नुपर्ने हुन्छ । अहिले त्यो पूरा गर्ने र बाटोका मोडहरु मिलाउनुपर्ने ठाउँमा मिलाउने लगायतका कामलाई तत्काल अगाडि बढाउँछौं ।’

मनाङमा हालसम्म यात्रुका लागि मुख्य रूपमा पाँच सिटे क्षमताका पिकअप जिप मात्र सञ्चालन हुँदै आएका छन् । जसका कारण यात्रुले कठिन यात्रा गर्नुपर्ने, महँगो भाडा तिर्नुपर्ने तथा सुरक्षित यात्रा गर्न नसक्ने समस्या छ । बस सञ्चालनका लागि आवश्यक रुट इजाजत पत्र लिनुपर्ने भएकाले यातायात व्यवसायीलाई सम्बन्धित निकायमा निवेदन दिन अनुरोध गरिएको प्रजिअ आचार्यले जानकारी दिए । ‘पहिला सञ्चालन हुने बसले रुट इजाजत पत्र लिनुपर्ने हुन्छ । त्यसपछि भाडा दर निर्धारण प्रक्रिया अगाडि बढ्छ’ प्रजिअ आचार्यले भने ।

सार्वजनिक बस सञ्चालन भएसँगै यातायात व्यवस्थापनमा उल्लेखनीय सुधार आउने, यात्रुहरूले उचित भाडामा सहज यात्रा गर्न सक्ने र मालसामान ढुवानीसमेतमा सहजता कायम हुने विश्वास गरिएको छ । हाल बेँसीसहर देखि मनाङको सदरमुकाम चामेसम्मको भाडा १२ सय रुपैयाँ तिर्नुपर्छ । यस क्षेत्रलाई नियाली रहेका एक यातायात व्यवसायीका अनुसार सर्वजनिक यातायातको रुपमा बस सेवा सञ्चालन गर्न सके त्यो भाडा दर ७ सय रुपैयाँभन्दा पनि कममा झार्न सकिनेछ ।