पोखरा ।
पोखरा ८ रत्नचोकमा रहेको रत्नज्योति माविका विद्यार्थी, अभिभावक, शिक्षक र सञ्चालकले युनाइटेड रेफरेन्स ल्याबोरेटरी प्रालि (युआरएल)का सबै सेवामा छुट पाउने भएका छन् । युआरएलले उनीहरुलाई सबै सेवामा ५० प्रतिशत छुट दिने भएको हो ।
छुटसम्बन्धी सम्झौतामा शनिबार युआरएलका अध्यक्ष ठाकुरप्रसाद पन्थ र रत्नज्योतिका प्राचार्य विष्णुप्रसाद भट्टराईले हस्ताक्षर गरेका छन् । यो सम्झौता आगामी दुई वर्षसम्म कायम रहनेछ । शनिबारै रत्नज्योतिमा भएको निशुल्क रक्त, दन्त र आँखा परीक्षणमा ५ सय ३ जनाको निशुल्क जाँच शिविर भएको छ ।
गण्डकी प्रदेशकै पहिलो र एकमात्र आइएसओ प्रमाणपत्र प्राप्त रेफरेन्स ल्याब युआरएलको प्राविधिक सहयोगमा भएको शिविरमा सहभागीको मधुमेह, रगतमा हुने खराब बोसो(टिजी) जाँच निःशुल्क गरिएको हो । शिविरमा आँखा परीक्षण हिमालयन आँखा हस्पिटल घारीपाटन र दन्त परीक्षण युआरएल हेल्थ केयरको प्राविधिक सहयोगमा भएको हो ।
कार्यक्रममा वरिष्ठ फिजिसियन डा कृष्णराज अधिकारीले खराब बोसो, थाइराइड, मधुमेह जस्ता रोग लाग्ने कारण, बाच्ने उपाय र उपचार पद्धतिबारे प्रकाश पारे । उनले यस्ता शिविरमा बेला बेलामा रगत जाँच गर्दा यस्ता रोग लाग्नुअगावै बाच्न सकिने र लागिसकेको भए पनि समयमै उपचार सम्भव हुने उल्लेख गरे ।
कार्यक्रममा युआरएलका अध्यक्ष ठाकुरप्रसाद पन्थले गण्डकी प्रदेशभर १६ शाखाबाट सेवा प्रवाह गरिरहेको जनाए । उनले अहिलेको अत्याधुनिक प्रविधि, मेसिन र दक्ष जनशक्तिबाट सेवा प्रवाह गरी प्रदेशकै अग्रणी ल्याबका रुपमा युआरएल स्थापित भएको उहाँको भनाइ छ ।
युआरएलका प्रबन्ध निर्देशक गणेशप्रसाद कोइरालाले युआरएलले विभिन्न संघ, संस्थासँग सहकार्य गरी शिविर गर्ने क्रममा यो १ सय ८९ औं भएको बताए । उनले समयसापेक्ष नयाँ प्रविधि, मेसिन र नयाँ परीक्षणसमेत थप्ने प्रदेशलाई रक्त परीक्षणमा आत्मनिर्भर बनाउन प्रयत्नरत भएको उल्लेख गरे ।
विद्यालय व्यवस्थापन समिति अध्यक्ष टुबराज बास्तोलाको अध्यक्षतामा भएको कार्यक्रममा विद्यालयका प्राचार्य विष्णुप्रसाद भट्टराई, संस्थापक सञ्चालक हेमन्त अधिकारी, भुवन सुवेदी लगायतले बोलेका थिए ।
