पोखरा ।
पोखरा महानगरपालिका वडा नं ९ ले वडाभित्र रहेका जेष्ठ नागरिकहरुलाई लक्षित गरी पोषिलो सातु वितरण गरेको छ । वडा नं ९ ले जेष्ठ नागरिकहरुलाई लक्षित गरी अघिल्लो वर्षदेखि सातु वितरण गदै आएको छ ।

वडा कार्यालयहरुले जेष्ठ नागरिकहरुलाई भ्रमण लगायतमा सहभागी गराउदै आएको भएतापनि पोखरा महानगरपालिका वडा नं ९ ले भने अघिल्लो वर्षदेखि वडा भित्र रहेका जेष्ठ नागरिकहरुलाई स्थानिय स्तरमा उत्पादन भएको पोषिलो सातु वितरण गर्दै आइरहेको छ । यस पटक भने सातु बितरणमा सहारा क्लबले समेत सहकार्य गरेको छ ।

उक्त कार्यक्रमको शुरुवात गर्दै पोखरा महानगरपालिका वडा नं ९ का अध्यक्ष दिपेन्द्र मर्सानीले पछिल्लो समय जेष्ठ नागरिकहरुले पोषिलो आहारबाट बञ्चित भइरहेको सन्दर्भमा वडा कार्यालयले वडामा रहेका ज्येष्ठ सदस्यहरु स्वस्थ एवं तन्दुरुस्त होउन् भन्ने उद्देश्यले पोषिलो सातु वितरण गरिएको बताए ।

ज्येष्ठ नागरिकहरुको स्वास्थ्य अन्य उमेर समुहको भन्दा कमजोर हुने भएकाले खानपानमा विशेष ध्यान दिनुपर्ने बताउँदै अध्यक्ष मर्सानीले वडाले वितरण गरेको सातुमा ज्येष्ठ नागरिकहरुले सजिलै पचाउन सक्ने तत्वहरु रहेको बताए । उनले पोखराकै उत्पादन भएकाले यसले स्थानीय उत्पादन प्रवर्दनमा समेत सहयोग पुग्ने बताए ।

पोखरा महानगरपालिका वडा नं ९ का सचिव कुलराज पौडेलले वडा कार्यालयको एक लाख र सहारा क्लबको एकलाख गरी कुल दुई लाख लागतमा सातु खरिद गरी जेष्ठ नागरिकलाई वितरण गरिएको हो । पौडेलका अनुसार वडामा सामाजिक सुरक्षा भत्ता लिने करिब ९ सय सेवाग्राहीलाई पोषिलो सातु वितरण गरिने छ ।

सो अवसरमा बोल्दै सहारा क्लवका पुर्व अध्यक्ष बिक्रम थकालीले सहारा क्लवले बालवालिका र युवाहरुको क्षेत्रमा काम गर्दै आइरहदा यस पटकदेखि जेष्ठ नागरिकहरुको सेवामा जोडिन पाउदा खुशि लागेको बताए ।

वडास्तरिय ज्येष्ठ नागरिक मञ्च पोखरा ९ का अध्यक्ष शेषनारायण पौडेलको अध्यक्षतामा सम्पन्न कार्यक्रममा वडासदस्य लक्ष्मी पहारीले स्वागत मन्तव्य राखेकी थिईन् भने टोलविकास संस्था समन्वय समिति पोखरा ९ का अध्यक्ष उत्तम जोशीले कार्यक्रम सञ्चालन गरेका थिए ।