पोखरा ।
पोखरा भ्रमण वर्ष औपचारिक घोषणाको तयारी पूरा भएको छ । आगामी ३ फागुनमा विधिवत रुपमा पोखरा भ्रमण वर्ष २०२५ घोषणा गरिने र त्यसको सम्पूर्ण तयारी पुरा भएको पोखरा महानगरपालिकाले बिहीबार पत्रकार भेटघाट कार्यक्रमको आयोजना गरी जानकारी दिएको हो ।
पत्रकार भेटघाट कार्यक्रममा वोल्दै पोखरा महानगरका प्रमुख धनराज आचार्यले ३ फागुनमा शनिवार पोखरा प्रदर्शनी केन्द्र नयाँबजारमा एक औपचारिक समारोहका बीच नेपाल सरकारका उपप्रधान तथा अर्थमन्त्री विष्णु पौडेलले उद्घाटन गर्ने जानकारी दिए ।
उद्घाटन पूर्व पोखराको रंगशाला, सभागृह र चिप्लेढुंगाबाट विभिन्न झांकी र्याली सहित पोखरा प्रदर्शनी केन्द्रमा पुगी औपचारिक समारोहमा परिणत हुने छ । र्यालीमा पोखराका ३३ वटै वडाको प्रतिनिधित्व र पर्यटन क्षेत्रको १ गरी ३४ वटा ब्यानर समावेश हुने मेयर आचार्यले जानकारी दिए ।
भ्रमण वर्ष सफल बनाउनका लागि महानगर प्रमुख धनराज आचार्यको नेतृत्वमा एक हजार ५५१ सदस्यीय मुल समारोह समिति निर्माण गरिएको छ । पर्यटन क्षेत्रबाट प्रतिनिधित्व हुने गरी रेवानका पूर्व अध्यक्ष गोपी बहादुर भट्टराइ संयोजक र दामोदर थापा उपसंयोजक रहने गरी कार्य सम्पादन उपसमिति गठन गरिएको छ । त्यसैगरी मुल समारोह समितिमा महानगर भित्रका राजनीतिक दलका प्रमुख र वडा अध्यक्षहरु, सल्लाहकार समितिमा पोखरा महानगर परिषद, कास्कीका चार वटै सुरक्षा निकाय र राजनीतिक दलका प्रतिनिधीहरु छन ।
भ्रमण वर्ष सम्पन्न गर्न गठित ४३ वटा उपसमितिले वर्षभरिमा काम गर्ने, पोखराम हुने विभिन्न कार्यक्रममा कोहीमा आयोजक, कोहीमा प्रवद्र्धक, सहयोगी बनेर भ्रमण वर्षलाई सफल बनाउने मेयर आचार्यले बताए । पोखरा उद्योग वाणिज्य संघ र लेखनाथ उद्योग वाणिज्य संघले पोखरालाई प्रतिनिधित्व हुने गरी कोशेली घरको निर्माण, र पर्यटन क्षेत्रका उद्योगहरुले समेत विभिन्न प्याकेजहरु समारोहका बीच घोषणा गरिने मेयर आचार्यले बताए ।
उनका अनुसार कास्की आदर्श समाज, एनआरएनए र बाहिर रहेका संघसंस्थाका प्रतिनिधीहरुलाई सद्भावना दुत घोषणा गरिने छ । विदेश विभागसंग सहकार्य गरेर अगाडि वढ्ने,देश र विदेशमा प्रचार प्रसारलाई जोड दिने र पोखरा क्षेत्रमा रहेको पर्यटकीय गन्तब्य समेट्दै पुस्तक प्रकाशन गर्ने अनि त्यसमा पनि क्युआर कोडको ब्यवस्था समेत गर्नेे उनले जानकारी दिए ।
पोखरा महानगर र गण्डकी प्रदेश सरकारको संयुक्त आयोजनामा उक्त कार्यक्रमको आयोजना हुनेछ । भ्रमण वर्ष सफल बनाउनका लागि विभिन्न देशका राजदुतहरुको समेत सहभागी रहने महानगर प्रमुख मेयर आचार्यले जानकारी दिए । उनका अनुसार भ्रमण वर्ष अवधिभर २० लाख पर्यटक भित्र्याउने अपेक्षा राखिएको छ ।
